Хүлэг азаргын үри,
Хүригшэ гүүнэй бэе,
Хурдан азаргын хүбүүн,
Хулагша гүүнэй унаган –
Эмниг харайгша эрдэниин
Эмээл дээрэ һуунам,
Эльгэн шаргал хүзүүень
Эльбэн эльбэн байнам.
Алтан һайхан жолооень
Зүүн гартаа баринам,
Алдар һайхан солыень
Баруун гартаа үргэнэм.
Байгал далайһаа хайратай
Баран зондоо дуулганам,
Сэлэнгэ мүрэнһөө хайратай
Сэлеэн зондоо дуулганам:
Хотогор һайхан бэетэй,
Хулман һайхан шэхэтэй,
Шара алтан һобойтой,
Шудхамал мүнгэн туруутай,
Торгон зээрдэ дэлһэтэй,
Тохом дороо хүлһэтэй,
Толгой дороо монсогтой,
Туруун дороо шабхайтай.
Огторгойдо хараасгай мэтэ,
Уһанда загаһан мэтэ,
Хабталзаһан харабсар мэтэ
Үзүүр гүйгөөшэ эрдэни
Үүрһээн байна урдатнай.
Турья-турья-турьялза,
Турьян байна урдатнай.
Дүрбэн булад туруунһаа
Дүлэ гаратарынь гүйбэ.
Дүшэн сагаан шүдэнһөө
Гал сахилган ерэбэ.
Гунан ехэ талынгаа
Голынь харан харайба.
Дүнэн ехэ дайдынгаа
Дүрынь барин шуумайба.
Бүтэн газараар гүйжэ,
Гэрэл гарган ерэбэ,
Хада газараар харайжа,
Харгы гарган ерэбэ.
Түрэл һайхан нютагтаа
Түрүүлжэ ерэбэ.
Аймаг түбэй газарта
Ахижа гараба.
Ехэ үдын городто
Илажа ерэбэ.
Урилдаа ехэтэ найрай
Урда заха бариба.
Огторгойдо туласа
Уни тооһо бурьюулдаг,
Хадада хүрэсэ
Хайр шулуу хаялуулдаг
Хүлэг галдан солоршог,
Хурдан морин алдаршаг!
Арад зондомнай магтуулаг,
Аша гушанартамнай һануулаг!
Хүлэг азаргын үри,
Хүригшэ гүүнэй бэе,
Хурдан азаргын хүбүүн,
Хулагша гүүнэй унаган,
Һара бүри һорижо,
Һүрэг эжэлээ гайхуула!
Жэл бүри илажа,
Зон амитанаа гайхуула!
Үндэр набтараар гүйжэ,
Үүлтэр соогоо магтуула!
Ай, арад зон,
Альман залуушуул,
Амар сайн,
Амгалан болтогой!..
