Камба Ла дабаанһаа буулгаһан Ямдрок Цо нуур.
Гандан дасанай нэгэ дуган соо.
Дабаан дээрэ буулгаһан фото-зураг.
«Огторгойдо һара, наран ба мүшэдэй байдаг бол дэлхэй дээрэ Гандан, Дрепунг ба Сера дасанууд байдаг» гэжэ түбэдүүдэй хэлэдэг үгэ бии. Ганса энээхэн үгэнүүд дээрэ бодомжолходо, ямар дасанууд байһыень ойлгохоор. Һара, нарантай жэшэмэ Гандан дасанда гэлэг шэглэл байгуулагдаһан түүхэтэй. 1409 ондо Богдо Зонхобо энэ дасан байгуулжа, тус шэглэл эндэһээ хүгжэһэн. Гандан дасанай һургуулинууд аргагүй шанга, шабинарынь эрдэм ном үзэжэ, эди шэдитэй боложо гарадаг байһан.
Дасанай байшанууд һүрөөтэй. Урда сагта мүнөөнэй техникэ болон авто-унаа байгаа бэшэ: 4-5 дабхартай шулуун гэрнүүдые хадын бооридо яагаад бодхооһон юм гэжэ гайхахаар.
Дуган бүхэндэ хоёр шабинартаяа һууһан Богдо Зонхобын дүрсэнүүд байна.
Хитад сэрэгшэд добтолходоо, энэ дасаниие нилээд ехээр һандаргааһан байна. Бүрин бүтэн гэр үлэһэн юм гү гэхээр шахуу байһан ха. Мүнөө маанадай ябажа байхада, эндэ тэндэ дүрбэн ханаараа, али үндэһөөрөө үгы, һууринь үлэшэһэн байшанууд үшөөл зогсоно. Нүгөө таладань заһабарилгын ажалнууд боложол байнхай һэн.
Хото шэнги болошоһон дасанай гудамжада хон-жэн. Аалин шэмээгүй гудамжаар ябажа байхада, эндэ хүн байдаг юм гү гэжэ һанахаар. Гол дуган ороходомнай, нэгэ хэды ламанар һуужа байгаа.
Аяншалгын харгыда гарахаа байхадам, түрэл түтим, суг хүдэлдэг нүхэдни гэхэ мэтэ мүнгэ үргэжэ, һайн ябаад ерэхыем хүсөө бэлэй. Тэдэ зонойнгоо нэрэ обог англи хэлэн дээрэ бэшүүлээ һэм. Энээнһээ уламжалан, уншагшадаа уридшалан мэдүүлхэеэ һананаб: гэнтэ Түбэд орон ошохо болоо һаа, дасанда оруулха нэрэ обогоо түбэд хэлэн дээрэ бэшээд ябахань шухала. Юундэб гэхэдэ, дасануудай ламанар англи хэлэн дээрэ бэшээтэй саарһа абанагүй. Эндэл абаһандань баярлааб.
Дуганууд соо Богдо Зонхобын мэндэ байхадаа хэрэглэдэг байһан хэрэгсэлнүүд, гар бэшэлгэнүүд, сэнтэй номуудынь наринаар хадагалагдадаг юм. Энэл дасанда Богдо Зонхобо тагаалал болоһон байна. Шарилынь алтан шара үнгэтэй субаргада шүнлөөтэй байһан тухай мэдээ һэмди. Мүн энэ субаргада Будда Шэгэмүүниин шүдэн, Богдо Зонхобын тулуур, үһэниинь, хубсаһан ба гуталынь мүнхэлөөтэй. Тиимэһээ дэлхэйн субарганууд сооһоо эгээл нангин байһыень ойлгохоор. Дуган соо фото-зураг буулгахань хорюултай байгаа.
(Үргэлжэлэлынь 8-дахи дугаарта уншахада болохо).
Валентина ЦЫРЕНЖАПОВА.
