Түбэд гүрэндэ буддын шажанай урда сагһаа хүсэ абажа дэлгэрһэн байхадань гү, тэндэхи яһатанай һүзэг шанга, гүнзэгы, бата бэхи гэжэ ойлгохоор. Хэдэн үедэ һалбаржа хүгжэһэн дасан дугануудай баян шэмэглэлтэй, урданайнгаа түхэл алдаагүй байһаниинь сэнтэй. Жэшээлбэл, нуурай дэргэдэ оршодог Дратунг дуганай һуурида Бадмасамбава бурхан бисалгалда һуудаг байһан юм. Тэрэ газартань дуган бодхоогдоһон. Тэрээндэ мүргэхэеэ һүзэгшэд үрхэлжэ ябадаг байна. Түбэдэй газар өөрын нюусатай, хаанашье ябаа һаа, илангаяа хүдөө талада ябахадаа болгоомжолхоор. Юундэб гэхэдэ, нангин шүтөөнэй газарнуудые ойлгомторгүй бузарлажа магад.
Буддын шажанай Энэдхэгһээ Түбэдтэ дэлгэрхэдэ, түбэдэй багшанар горитойхон ажал ябуулһан. Бурхан багшын айладхаһан ном суртаал өөһэдынгөө хэлэн дээрэ оршуулһан. Ном тухай хэлэхэ болоо һаа, лалын ба христос шажанууд ори ганса номтой. Буддын шажанда тоо томшогүй олон юм. Гансал буддын шажанда хооһон шанар тухай ойлгуулагдадаг заабари бии. Буддын шажанай гүнзэгы удхатай байһаниинь эндэһээ элирнэ.
Гороогой һүүлшын үдэртэ нэгэ дуган ороо һэмди. Тэндэ Миларепа бурханай бисалгал хэдэг байһан агы нүхэн байгаа. Тэрээн соо Миларепын тулуур ханада түшүүлээтэй байна һэн. Минии харахада, хүндэ гэгшын гонзод гэһэн шулуун аад, шулуун. Яагаад, ямар талаһаань Миларепа тулуур болгожо баряад ябадаг байгаа гээшэб, энээгээр тулуур хэхын тула ямар хүсэ шадал хэрэгтэйб гэхэ мэтын асуудалнуудта абтахаар.
Эндэхи арадай сэдьхэл бодол тад ондоо. Жэшээлбэл, маанад эд зөөридэ, байдалаа һайжаруулха талада анхаралаа ехээр хандуулдагбди. Тэрэ зөөриеэ алдахадаа, хойноһоонь сэдьхэлээ зободогбди. Эдэ зон баһал зөөри суглуулдаг, үхэр малаа үдхэдэг. Харин дасан дугануудта хандиб үргэхэ болоо һаа, зөөриеэ дууһан үгэхэ хүсэлэнтэй зон юм. Үшөө нэгэ жэшээ дээрэ тогтохо болоо һаа, гороодо ябахада, хубсаһан шорой тооһон болошоно. Энээндэ һанаагаа зобожо ябахадам, һунажа мүргэдэг зоной хубсаһан ямархан болоно гэжэ һананабта. Тиибэшье тэрээн соохоноо жаргалтайнууд, хүхюутэйнүүд ябана даа.
(Үргэлжэлэлынь 11-дэхи дугаарта).
Валентина ЦЫРЕНЖАПОВА.
