Цыденжаб Мункин 1917 ондо Могойтын аймагай Хүһөөшэ нютагта түрэһэн, дунда һургуулитай, Агын багшанарай училищи дүүргэһэн юм.
Агын тойрогой комсомолой хороондо инструктораар хүдэлжэ байһанаа, 1939 оной сентябрь һарада сэрэгэй албанда татагдаһан байна. Ташкентын ябаган сэрэгэй училищида һурахаяа эльгээгдэжэ, тэрэнээ 1940 ондо дүүргээ. Эсэгын дайнай эхилхэдэ, офицернүүдэй мэргэжэл дээшэлүүлгын курсда һуража байгаа. Автоматчигуудай взводой, һүүлээрнь 46-дахи стрелково полкын ротын командир ябаһан. Зүүн Пруссида фюрерэй захиралтаар Кенигсберг хото (мүнөө Калининград) хэрэм-хото болгогдоһон байгаа. Эндэ Вермахтын командовани сэрэгэй томо гарнизон бии болгожо, тэндээ немцүүдэй шэлэгдэмэл отрядуудые, үшөө танкнуудые, зэбсэгүүдые суглуулһан юм. Эрид шанга добтолго хэжэ, хэрэм-хото эзэлхэ гэһэн бэлэн бэшэ даабари совет сэрэгшэдэй урда тобойгоо. Тон түрүүн эзэлхэ гол шухала объектнүүдэй нэгэн гэхэдэ, штаб байгаа. Энэ даабари дүүргэхэ бүлэгые гвардиин лейтенант Цыденжаб Мункин ударидаһан юм. Гитлеровцүүдэй буугай болон пулемёдой һомонууд аадар мэтэ адхараа, миномёдооршье сохёо. Иимэ буудалдаан соо толгойгоошье үргэхэ аргагүй шэнги, харин яабашье захиралта дүүргэхэ хэрэгтэй. Эгээл түрүүн гвардиин лейтенант добтолгодо ороо. Фашистнууд аргагүй шанга эсэргүүсэлтэ үгэбэшье, дарагдаа һэн.
Шэн зориг, баатаршалга гаргажа, сэрэгэй даабари амжалтатай дүүргэһэнэй түлөө Цыденжаб Мункин Александр Невскиин орденоор шагнагдаһан байна. Тиигэжэ Агын Буряадай тойрог дотор иимэ шагналай ганса кавалер болоһон. Гвардиин лейтенантын эрэлхэг зоригойнь гэршэ гэхэдэ, Дайшалхы Улаан Тугай орден болон олон медальнууд, тэдэнэй тоодо «За взятие Кенигсберга» медаль болоно юм.
Цыденжаб Мункин Эсэгын дайнай һүүлээр нютагаа бусажа, багшаар хүдэлөө, хүүгэдээ хүмүүжүүлээ. Баатарлиг замтай фронтовигай уг хүбүүдынь, аша гушанарынь үргэлжэлүүлээ.
Цыденжаб Мункин 1966 ондо алтан дэлхэйтэеэ хахасаһан. Зоригтой гвардиин лейтенантын нэрэ, баатаршалгань нютагайхидайнь дурасхаалда мүнхэ үлөө. Волейболоор Цыденжаб Мункинай шанда хүртэхын түлөө мүрысөөн үнгэргэгдэдэг юм.
