Майн 12-то Уласхоорондын эмнэлгын сестрагай үдэр тэмдэглэгдэдэг. Тус hайндэр Россида 1993 онhоо заншалта гэжэ зарлагдаһан.

Эмнэлгын сестра – энэрхы сэдьхэлэй, эрэлхэг зоригой, хизааргүй тэсэбэриин hүлдэтэй мэргэжэл. Илангаяа мүнөө ковид үбшэнэй дэлгэрhэн сагта эмнэлгын сестранууд ёhото супергеройнууд болоhон.
Росси гүрэндэ эгээл түрүүшынхеэ тус мэргэжэл I Пётр хаан бии болгоhон түүхэтэй. Хаанай зарлигаар «Монахиня эхэнэрнүүдые эмнэлгын газар эльгээхэ» гэhэн хуули баталагдажа, эхэнэрнүүд энэрхы сэдьхэлэй сестрагаар томилогдожо эхилhэн юм.
«Эмнэлгын сестрагай үдэрэй» hайндэрэй түүхэ XIX зуун жэлһээ эхитэй. 1853-1856 онуудта үргэлжэлhэн Крымэй дайнай үедэ Флоренс Найтингейл гэжэ эхэнэр шархатаhан сэрэгшэдые харууhалалгын албан эгээл түрүүшынхеэ байгуулhан. Тэрэнь аргагүй hайн нүлөө үзүүлжэ, үхэлтэ ушарнууд нилээд үсөөрһэн гэдэг. Саашадаа Ф.Найтингейл тусхай жаса байгуулжа, эмнэлгын сестрануудай hуралсал эмхидхэhэн түүхэтэй.
1934 оной майн 12-то, Ф.Найтингейлэй түрэhэн үдэртэ, тэрэнэй нэрэмжэтэ Уласхоорондын жаса байгуулагдаhан. Тэрэ үдэрhөө Эмнэлгын сестрануудай үдэр тэмдэглэгдэжэ эхилhэн байна.
Статистикын албанай мэдээгээр:
- үбшэнтэдые элүүржүүлгын бүхы хэрэгүүдэй 80 хуби эмнэлгын сестранууд дүүргэдэг уялгатай;
- дэлхэй дээрэ эгээл олон тоотой эмнэлгын сестрануудтай гүрэн – Финлянди: 2162 – 100000 хүндэ. Харин эгээл үсөөн - Гаити: 5 – 100000 хүндэ;
- эмнэлгын сестрануудай 80 хубинь – эхэнэрнүүд;
- эмнэлгын сестра ажалайнгаа халаанай үедэ дунда зэргээр 1600 кг шахуу хүндэ юумэ (үбшэнтэдые, элдэб оньhон хэрэгсэлнүүдые г.м.) үргэдэг.
Мүнөө манай байдалые энэрхы сэдьхэлэй сестрагүйгөөр миин hанаадшье үзэхэнь бэрхэтэй. Хүн бүхэнэй ами наhанай харуулда үдэр бүри бэеэ зорюулдаг эмнэлгын сестра – эгээл хүндэтэй ба алдар солотой албатан! Эсэгэ ороноо хамгаалгын Агууехэ дайнай фронтнууд дээрэ баатаршалга харуулhан эрэлхэг зоригтой эмшэдэй буянтай ажал мүнөөнэй эмнэлгын сестранууд үндэр зэргэдэ үргэлжэлүүлнэ.

Баярма Баторова.

You have no rights to post comments