Онлайн аргаар эмхидхэгдэһэн хуралдаанда зуу гаран хүн хабаадаа. Тойрогой Захиргаанай хүтэлбэрилэгшэ Буянто Батомункуев, хизаарай амбан захирагшын орлогшо Аягма Ванчикова гэгшэд интернедэй уудамаар хабаадагшадта хандажа, тойрогой ойн баяраар бултаниие амаршалаа. «Түрэл тойрогнай 85 жэлэй хугасаада сагай элдэб бэрхэшээлнүүдые дабажа, урагшаа бата бэхи дабшаһаар. Ажалша бүхэриг зоноороо, атар тарган хони малаараа, эрхим ургаса абадагаараа холо ойгуур сууда гаража ябадаг тойрогнай урданай баян түүхэтэй юм. Тойрогой хүгжэлтэдэ хэдэн үе сагуудта үнэн сэхэ, шударгы ажаллаhан ажалай баатарнууд, мэндэ ябаhан ветеранууд манай омогорхол гээшэ», - гэжэ Буянто Батомункуев хэлээ. Аягма Ванчикова үгэ абахадаа, тойрогой хүгжэлтэдэ хубитаяа оруулһан зондо хизаарай амбан захирагшын ба өөрын зүгһөө халуун баярые хүргөө. 

«Тужи» парк тухай слайд.

   Буянто Балданжапович «Стратегические направления развития округа в составе Забайкальского края» гэһэн элидхэл соогоо ажаһуугшадай социальна байдал, экономикын, хүдөө ажахын, эрдэм һуралсалай, соёлой ба бусад һалбаринуудые хүгжөөхэ түсэбүүд тушаа хөөрэжэ үгөө. Тойрогой Захиргаанай хүтэлбэрилэгшын дэргэдэ байгуулагдаһан ниитэ зүблэлэй түрүүлэгшэ Баир Галсанов «10 шагов к устойчивому развитию села Аги» гэһэн сэдэбээр элидхэл хэжэ, олоной һонирхол татаа. Элидхэгшын хэлэһээр, оршон үедэ хүдөө нютагуудһаа зоной хото город нүүхэ ябадал бүри олошорно. Илангаяа залуу үетэн хүдөөдэ үлэнгүй, олоной газар руу тэгүүлнэ. Хүдөөдэ ажал хэхэ зон хомор болонхой. Хизаарай засаг зургаан зоной хүдөөдэ үлэжэ, ажал хэхын тула дэмжэлтын программануудые, гранттай конкурснуудые эмхидхэнэ. Таряашанай-фермерскэ, үмсын хамһабариин ажахынуудые, хүдөө ажахын урьһаламжын кооперативуудые байгуулха эрхэ нүхэсэл тойрогтомнай байгуулагданхай.

   ЗабГУ-гай багша, профессор, культурологиин доктор Маргарита Гомбоева, РАН-ай Сибириин таһагай байгаалиин нөөсэнүүдэй, экологи болон криологиин институдай эрдэмтэ хүдэлмэрилэгшэ Надежда Промазкова гэгшэд хүдөөдэ аяншалга хүгжөөхэ тухай һанамжануудтаяа хубаалдаа. Мэдээжэ уран барималша Даши Намдаковой түрэһэн Хёлгын аймагай Үхэриг тоонто нютагта мүнөөнэй шэнжэтэйгээр байгуулагдаһан «Тужи» парк жэшээ болгон нэрлэгдээ. Тойрогой олзын хэрэг эрхилэгшэд «Тужи» паркһаа жэшээ абажа, өөһэдын дэбисхэртэ аяншалгын булан нээхэ аргатай. Юундэб гэхэдэ, хүдөөгэй аяншалга ехэ хүгжэлтэ абана. Тойрог руумнай олон газарһаа аяншалагшад ябаха аргатай. Аяншалагшадай олоор ябахада, экономико хүгжэхэ, экономикын хүгжэхэдэ, зоной байдал һайжарха.

   Агын гимназиин захиралай орлогшо Оюна Дамдинжапова мэдээсэхэдээ, үхибүүдэй эрдэм ухаа хүгжөөхэ талаар шэнэ оньһон арганууд нэбтэрүүлэгдэнэ гэжэ тодорхойлоо. Шэнэ аргаар һурагшад эрдэмэй-техническэ шэнжэлэлгэнүүдые хэнэ. Һурагшадай шэнжэлһэн түлэблэлнүүд саашадаа үйлэд-бэридэ, хүдөө ажахыда, экономикодо заатагүй хэрэглэгдэхээр хараалагдана.

   Хуралдаанай пленарна зүблөөнэй дүүрэхэдэ, хабаадагшад секциин хүдэлмэринүүдтэ хубааржа, элидхэлнүүдые шагнаа. Түрүүшын талмайда тойрогой социально-экономическа хүгжэлтын түлэблэлнүүдэй, үйлэдбэриин, аяншалгын, олзын хэрэг эрхилэлгын асуудалнууд харагдаа. Хизаарай экономическа хүгжэлтын сайдай орлогшо Юлия Иванова тойрогой дэбисхэртэ аяншалга хүгжөөхэ арга боломжонууд тушаа хөөрэжэ үгэһэн байна. Манай Агын тойрогой алдарта, нангин шүтөөнэй газарнуудаар хари гүрэнhөө, гүрэнэй олон нютаг газарнуудһаа аяншалагшадай олоор ябадагыень ажаглахаар байдаг. Амаралгын булангууд руу ошодог харгынууд заһабарилагдана, байра байдалай эрхэ нүхэсэлнүүд һайжаруулагдана гээшэ. Түмэн зоной бараалхаха газарнуудаар аяншалалгын олон маршрудууд бии. Хизаарай Экономическа хүгжэлтын яаман аяншалгын һалбари хүгжөөхэ талада олзын хэрэг эрхилэгшэдэй хоорондо конкурс соносходог. Байгша ондо конкурсын илагшад боложо тодорһон олзын хэрэг эрхилэгшэд грант шүүжэ, аяншалгын шэглэлээр түлэблэлнүүдые бэелүүлжэ эхилэнхэй. Зариман амаралгын булангуудта инфраструктура хүгжөөнэ, хэмжээ ябуулгануудые эмхидхэнэ, сувенирнэ бүтээлнүүдые хэжэ наймаална бшуу.

(Үргэлжэлэлынь 47-дохи дугаарта уншахада болохо).

Эрдэни ЧИМИТДОРЖИЕВ.

You have no rights to post comments