Тодорхойлходо, Хүнхэртэ Ольга Жамсарановагай, Ага тосхондо Шираз Сароян болон Алварт Испирянай, Амидхаашада Асатур Маргарянай, Шэтэ, Нэршүү ба бусад хото тосхонуудһаа асарагдаһан хилээмэн ажаһуугшадта дурадхагдадаг. Һүүлэй жэлнүүдтэ Могойтодо олзын хэрэг эрхилэгшэ Наталья Жамцарановагай ударидадаг эмхиинхидэй болгоһон хилээмэн ажаһуугшадай дунда эрилтэ ехэтэйгээр наймаалагдана. «Могойтын хилээмэн амтатай, шанартай», - гэжэ худалдан абагшадһаа нэгэтэ бэшэ дуулдаһан байха юм. 

Олзын хэрэг эрхилэлгэ гээшэ экономикын хүгжэлтын нэгэ шэглэл, hалбари болодог. Энэ хэрэгтэ бэеэ зорюулжа хүдэлдэг зоной тоо манай тойрог дотор үсөөн бэшэ. Тэдэнэй дунда аралжаа наймаада бүхы наhаяа зорюулhан зоншье, энэ хэрэг туршажа эхилhэн залуушуулшье бии. Наймаа ябуулха хүсэлтэй зондо гүрэнэй, хизаарай засаг зургаануудһаа дэмжэлтэ үзүүлэгдэдэг гээшэ.

Могойто тосхондо худалдаа наймаа ябуулдаг, ажаhуугшадые эдеэ хоолой талаар хангадаг газарнууд эли бодо олон болонхой. Хилээмэ, булочка, печени г.м. эдеэ хоолой зүйлнүүдые болгожо худалдадаг газарнууд баһал үсөөн бэшэ. Олзын хэрэг эрхилэгшэ Наталья Жамцаранова талхаар эдеэ хоолой элдэб зүйлнүүдые болгодог аралжаа наймаа нээжэ, амжалтатай ябуулжа эхилэнхэй. Тосхоной ажаһуугшад хилээмэ болгодог газар руу дуратай ябадаг юм. Наймаашан Н.Жамцаранова «Проекты развития региона» гэһэн программын дэмжэлтээр хизаарай үйлэдбэри хүгжөөдэг жасаһаа 16 сая түхэригэй хүнгэлэлтэтэй урьһаламжа абажа, түлэблэл бэелүүлжэ эхилээ һэн. Анхан үйлэдбэриин байһан байшан һэльбэн шэнэдхэжэ, шэнэ түхэлдэ оруулаа. Зайн галай утаһануудые, дулаасуулгын түхеэрэлтэнүүдые һэлгүүлээ, заһабарилга хээ. Байшанай бүтэһэн хойно түхеэрэлтэ абажа эхилээ. Эдэ түхеэрэлтэнүүд Италиин үйлэдбэриин. Тиимэһээ тэндэһээ захижа асаруулһан байна. Хари гүрэнэй түхеэрэлтэнүүдэй сэнгэй дээшээ байдагынь мэдээжэ. Зээлиин мүнгэнэй хажуугаар олзын хэрэг эрхилэгшэд өөһэдын мүнгэн зөөри оруулаа бшуу.

Пекарни соо. 

Наймаада табигдаһан хилээмэн.gtrkchita.ru сайтын фото-зурагууд. 

Н.Жамцарановагай пекарнида. Гэр бүлын архивай фото-зураг.

Могойтодо шэнэ пекарни нээгдэжэ, һая болгоһон хилээмэнэй хоншуухан үнэр хангалтажа, дүтэ шадар үнгэржэ ябаһан зоной анхарал татадаг. Сагаан халаад үмдэһэн ажалшад стол дээрэ талха худхажа, эһэхыень табидаг. Кондитер пеэшэн сооһоо булочка, пирог, печени, коржик, пирожки, рогалигууд, печени, пряник, пиццэ г.м. талханай зүйлнүүдые гаргажа, наймаада табидаг гуримтай. Хилээмэнэй цехые даагша Наталья Жамцарановагай хөөрэһөөр, 2021 онһоо олзын хэрэг эрхилнэ. «Тэрэ 16 сая түхэригөөр юу абахаб» гэһэн бодол Наталья Владимировнагай толгойдо ороо бшуу. Ага, Шиилхэ, Оловянна тосхонуудаар ябажа, пекарнинуудые хараа, хилээмэ болгодог үйлэдбэринүүдтэй танилсаа. Интернедтэ орожо бэдэрээ. Һүүлэй һүүлдэ Новосибирск хотын «Хлеб-сельмаш» эмхиин сайт нээжэ, пекарнида хэрэгтэй хэрэгсэл болон түхеэрэлтэнүүдтэй танилсаад, иимэ юумэн ха юм гэжэ ойлгоо ха. Зайн галаар, мүн түлеэгээр халадаг пеэшэн, талха худхадаг, һагшадаг түхеэрэлтэнүүдые, талха дэлгээдэг стол, шэгнүүр, хилээмэнэй формонуудые ба бусад хэрэгсэлнүүдые хари гүрэнһөө захяа.

Наталья Жамцарановагай мэдүүлһээр, түлэблэл бэелүүлхэдээ, «Хлебомир» кампанитай суг хамта эхилээ. «Хлебомир» хадаа «Пекарни Коваль» гээшэтэй, мүн тиихэдэ «Агроэликс плюс» эмхитэй нягта харилсаатай ажалладаг байна. Талхаяа Могойтын «Агроэликсһээ» абадаг гуримтай. Тус эмхи хара ба сагаан сортын талхаар, һагшадаһаар хангана. «Хлебомир» эмхи баһал талхаар хангадаг.

Үйлэдбэриин цех соо 15 хүн ажаллана. Тэдэ 2 пеэшэн соо 20 гаран янзын талханай ба кондитерска эдеэ хоол буйлуулна. Хилээмэ ба бусад хоолоо эрдэм һуралсалай, эмнэлгын газарнуудаар тараадаг. Могойтоһоо гадна Ага, Шэтэ, Оловянна абаашажа, наймаада табидаг болонхой. Олзын хэрэг эрхилэгшэ пекарниин үйлэдбэриеэ үргэдхэхэ түсэбтэй. Өөрын павильон нээхээр хараална. Хилээмэ болгоходоо, СанПинай бүхы эрилтэнүүдые сахижа, ажалаа ябуулдаг. Ажалтад тусхай курснуудые гаража, мэргэжэлээ дээшэлүүлһэн. Хүдэлдэг зон барандаа түрүүшын үдэрһөө ажаллана. Салин саг соогоо абадаг шуу.

Саашадаа ажалай 24 һуури байгуулха зорилготой. Эндэ Мо-гойтын аграрно-үйлэдбэриин техникумтэй хэлсээ баталжа, ажалшадаар хангагдаха асуудалаа шиидхэнхэй. «Повар-кондитер» гэһэн мэргэжэлээр техникум дүүргэһэн хүбүүд, басагад пекарнида хүдэлхэ аргатай болохонь.

Жэлэй туршада 228 тонно эдеэ хоол буйлуулжа, арад зондоо наймаалхаар хараалнад. Олзын хэрэг эрхилэгшын тэмдэглэhээр, түрүүшээр зон муугаар ябадаг байгаа. Һүүлэй үедэ эдэбхитэйгээр ябадаг болоо. Ажаhуугшадые һайн хоолоор хангахын тула эдеэнэйнгээ шанарта анхаралаа хандуулдаг. Хилээмэнэй халуун, hая болгоhон байхань шухала гэжэ Наталья Владимировна хэлэнэ.

Агын тойрогой байгуулагдаһаар 85 жэлдэ зорюулагдаһан, «Агинский Бурятский округ: стратегия развития, технологии и образы будущего» гэһэн эрдэмэй-дүршэл абалгын хуралдаанда Наталья Жамцаранова пекарниин ажабайдал тушаа дэлгэрэнгы элидхэл хэһэн байгаа. Тэрэ элидхэлынь олондо һайшаагдаа. Хизаарай экономическа хүгжэлтын яаманай мэргэжэлтэд элидхэл шагнажа, олзын хэрэг эрхилэгшын ябуулжа байһан хэрэгтэнь амжалта хүсөө. «Манай пекарниин хилээмэн амтатай гэжэ зонһоо дууладагбди. Ажаһуугшадай үйлэдбэрииемнай үндэрөөр сэгнэжэ байһандань баяртай байдагбди», - гэжэ Н.Жамцаранова түгэсхэлдөө хэлээ.

Эрдэни ЧИМИТДОРЖИЕВ.

You have no rights to post comments