Уран зурааша, философ, аяншалагша Николай Рерих энэ газарта Шамбала руу ородог «хойто бартаанууд» бии гэжэ бэшэһэн байдаг. Эндэ 150 сая жэлэй саана вулкан дэлбэржэ байһан, мүнөө болотороо эртэ урдын амитадай шулуужашаһан үлэгдэлнүүд олдоһоор... ХVII зуун жэлдэ губиин ноён Хутагт Данзанравжаа 3 дуган бариһан байна. Арад зоной дунда тэрэнь «Говийн гурван дуган» гэжэ нэршэһэн. Тэрэнэй барилга һонин түүхэтэй.
Нэгэтэ бисалгалда һууһан Данзанравжаа өөр руунь мүлхижэ ябаһан могой бариба. Долоон хоног эдеэлүүлһэнэй удаа түшэмэлнүүдтээ хэлэбэ: «Энэ могой – Галба хадын эзэн, зорюута намтай уулзахаяа ерээ. Ошожо, Галба хада олоод, могойе тэндэ табигты. Тэрэ һууринай, һонин хабсагайнуудайнь, Галба хадын хажуудахи голой зураг хээд ерэгты». Һүүлдэнь Данзанравжаа энэ һуурин өөрөө ерээд, иигэжэ хэлэһэн байна: «Хэрбээ арад зомни энэ юрэ бусын элшэтэй нангин газарта шүтэбэл, байгаалитай харилсааниинь зохилдохо, амгалан тайбан байха, хүгжэхэ. Бүхэдэлхэйн үерэй болоходо, хажуудань байһан зонтоёо үлэхэ замбуулинай ори ганса газар юм. Энэ һууринда энэ магтаалһаа дээшэ юумэ олоногүйб».
Дасанай гурбан сүмэ бариһанай удаа Данзанравжаа багша тойроод байһан бүхы шулуунуудые бузарһаа болон ада шүдхэрнүүдһээ өөрөө арилгажа арюудхаһан байна. Энэ түбтэ дүтэхэнэ оршодог 108 агы нүхэндэ, хара зоной байдалһаа аминдаа, ламанар 108 хоногой хугасаа соо бисалгалда һуудаг байһан. Һүзэгшэд «Дэмчигийн хийд» ерэжэ, шэнэ элшэ хүсэтэй, шэнэ хүсэ шадалтай боложо, нүгэл хилэнсэгээ арилгадаг, тиигээд Шамбалын орондо Данзанравжаа багшатай уулзаха гэһэн онсо ёһолол хүүлэдэг юм. Аяншалагшадай хэлэһээр, тус газарта мобильна телефонууд хүдэлхэеэ болидог. «Дэмчигийн хийд» сүмын оршон тойрон туйлай һайхан байгаалитай.
