Жэшээнь, нэгэ хүн таниие хэдыдэб даа гомдохооһон, муу юумэ хэһэн гэлэй. Тиихэдэнь энэ хүн ходо иимэ муугаар байдаг, намда ходо хоро хүргэхые оролдодог гэжэ һанана. Иигэжэ тэрэ хүн тухай бодомжолходоо, хүндөөр һанаагаа зобонот. Тэрэ ушар нэгэ дахин болоо, дахин тантай ушархагүй, жэл гү, али үни үнгэрһэн муу ушар мүнөөдэрэйтнай байдал хорлохо ёһогүй. Буддын шажанай ойлгосоор, тэрэ ушар үнгэрөө, үнгэрһэн сагай юумэ энэ сагта татажа асаралтагүй, тэндээ үлэг. Тэрэ сагта энэ ушарһаа таанад дүршэл, дадал абаат, саашань замаа үргэлжэлүүлэгты.
Ерээдүй тухай баһа һанаагаа зоболтогүй. Энэдхэгэй гайхамшагта гүнзэгы бодолто Шантидева «Вхождение на путь бодхисаттвы» ном соогоо иигэжэ бэшэһэн байдаг: «Үнгэрһэн юумэнэй түлөө мүнөөдэр һанаагаа зоболтогүй. Үглөөдэр болохо юумэнэй түлөө мүнөөдэр һанаагаа зобоһоной хэрэггүй. Хүндэ байдалда оробошье, энэ орёо асуудал шиидхэхэ шиидхэбэритэй ха юмта. Тиимэһээ һанаагаа зоболтогүй. Хэрбэеэ энэ орёо асуудал шиидхэхэ аргагүй һаа, бэеэ бү тамалагты. Һанаагаа зоболготнай энэ орёо асуудал шиидхэхэгүй». Эдэ үгэнүүд удхатай, мүнөөнэй байдалдашье хэрэглэхээр. Һанаагаа зоболго бэеын физическэ, психологическа энхэ элүүртэ һаад ушаруулдаг, ажабайдалдамнай муу нүлөөтэй.
Уур сухал, ехэрхүү зан, гомдол, һэжэг г.м. оюун ухаанай (сознание) мүн шанар бэшэ. Хүнэй оюун ухаанай байдал тогтууригүй, хубилхадаа бэлэн, тиимэһээ абари зангай муу шэнжэнүүд баһал тиимэ. Хэндэб даа сухалдахадаа, гомдоходоо гү, һанаа сэдьхэлээ зобоонобди. Ямар ушараар сухалдаабиб, оюун ухаандам, оршон тойронхи байдалдам ямараар нүлөөлнэб гэжэ хараха, ойлгохо хэрэгтэй. Иигэжэ бисалгалай байдалай талаар бэеэ «шэнжэлэлгэ» элдэб муу ушарнуудтай тэмсэлгэдэ туһална. Хүн олонхи ушарта зорюута намда хорлоно гэжэ һанадаг. Жэшээнь, магазинда наймаашан бүдүүлигээр хандаба гэлэй. Тиихэдэнь наймаашан зорюута, намдал ганса иигэжэ хандана гэжэ һанадаг, иимэ мэдэрэлээ ондоошье хүндэ ашаха аргатай байдаг. Тиигэжэ энэ мэдэрэлээ улам ехэ болгонот, һанаагаа зобоно, сэдьхэлээ хүдэлгэнэт, магад тэрэ хүн энээн тухай нэгэшье бодоногүй, һананашьегүй.
(Үргэлжэлэлынь 47-дохи дугаарта уншахада болохо).
Нордоп БАБУЕВА.
