"Ганжуур" ном.
Жэлэй туршада Агын дасанда 6 ехэ хурал хурагдадаг. Тэдэ “Ганжуур” уншалгаар эхилдэг байна. Тиигэжэ октябриин 21-дэ, Санжадай хуралай урда тээ “Ганжуур” хурагдаа, удаань ноябриин 22-то, Зула хуралай урда тээ уншагдаха юм. Юундэ заабол “Ганжуур” уншагдадаг бэ? Энэ асуудалда харюу бэдэрбэбди. “Ганжуур” гэһэн үгэ түбэдһѳѳ оршуулхада, Бурхан багшын һургаалнууд болоно, - гээд Агын дасанай лама Дмитрий Шаханов тайлбарилба. - “Ганжуур” соо Бурхан багшын буддын шажанай али нэгэн талыень тайлбарилжа, элдэб газарта, элдэб ушараар хэлэһэн һургаалнууд оруулагданхай. Эдэ һургаалнуудые һайн бэлэдхэлтэй эрдэмтэн гү, али лама санаартан лэ ойлгохо. Харин юрын, бэлэдхэлгүй зоной удхыень ойлгохонь орёо. Тиимэһээ “Ганжуур” тухай хэлэхэдээ, мүн лэ “Данжуур” тухай хэлэхэ ушартай. “Данжуур” соо һургаалнуудай тайлбаринууд суглуулагданхай бшуу. Хэмжээгээрээ “Данжуур” һураггүй ехэ: “Ганжуурай” 108 ботиһоо бүридэдэг һаа, “Данжуур” 224 ботитой ном юм. “Данжуур” соо үгтэһэн тайлбаринуудые гол түлэб Энэдхэгэй эрдэмтэ ламанар бэшэһэн. Урдын түбэд, хитад эрдэмтэд Бурхан багшын һургаалнуудта тайлбаринуудые мүн лэ бэшэһэн, теэд тэдэниинь “Данжуурта” ороогүй. Юундэб гэхэдэ, иигэжэ энэдхэг заншалнууд сахигдажа, Бурхан багшын һургаалнууд хазагайруулагдаагүй болоно.
Дэлгэрэнгыгээр 43-дахи дугаарта.
