СОЦИАЛЬНА ЭМХИНҮҮД ЭРХИМЭЭР ХҮДЭЛДЭГ   

«Хила» хүдөө һууринай захиргаанай архивай фото-зурагууд.

   Энэ хүдөө һууринай бүридэлдэ Остречная, Ага, Булаг станцинууд, Арын-Булаг, 71-дэхи разъезд болон Хүрэлжэ – зургаан нютаг ородог. Хүдөө hууринай административна түбынь станци Ага болоно. Нютагууд административна түбһөө 7 модо зайһаа 60 модо зай хүрэтэр оршодог. Дэбисхэрынь 3613 гектар болодог юм.
   2022 оной январиин 1-эй тоо бүридхэлэй баримтануудаар, «Хила» хүдөө hууринда 1315 хүн ажаhууна.
   Дэбисхэр дээгүүрнь Үбэр Байгалай хизаарай Шэтын таһагай түмэр харгы болон федерельна удха шанартай «Шэтэ-Забайкальск» авто-унаагай харгы гарадаг юм.
   Хила нютагта социальна удха шанартай бүхы эмхинүүд – дунда һургуули, «Малышок» хүүгэдэй сэсэрлиг, 2020 ондо заһабарилагдаһан соёлой байшан, хүдөөгэй номой сан, Россиин түмэр харгын эмхи, «Могойтуйский» мяханай комбинат, «Могойтуйский» үүлтэртэ завод болон ниитэ эмхинүүд – ветерануудай ба залуушуулай зүблэлнүүд, эхэнэрнүүдэй клуб эдэбхитэйгээр хүдэлдэг юм.
   Хилын дунда hургуулида 139 хүүгэд hурадаг, 20 багшанар эрдэм мэдэсэ олгуулдаг.
   «Малышок» хүүгэдэй сэсэрлигтэ 52 хүмүүжэмэлнүүд ябана, 4-hөө 7 наhа хүрэтэр бүлэгтэ – 22 хүүгэд, 1,5 наhатайhаа 4-тэй болотор – 20 хүүгэд, адаптивна бүлэгтэ – 10 хүүгэд.

АРИГ СЭБЭРТЭ, БОЛБОСОН ТҮХЭЛДЭ - ГОЛ АНХАРАЛ

                                   Ниитэ хэрэгтэ – хамтаараа.  

 
   «Хила» хүдөө hууринай захиргаанай толгойлогшо Балдан-Доржи Бальжинимаевай тэмдэглэhээр, хоёр жэлэй саана толгойлогшоор хүдэлжэ эхилхэдээ, нютагаа арга шадалаараа болбосон түхэлтэй, ариг сэбэр болгохо, дунда hургуулиин хүүгэдтэй ба залуушуултай ажал ябуулха гэhэн гол зорилгонуудые табиhан байна. Бодото дээрээ юун хэгдээб гэхэдэ, станци Агада аадар бороогой hүүлээр муудаһан харгы «Агауглесбыт» эмхиин туhаар заhабарилагдаа. Шэтын «Дорстройсервис» ба «УКС» эмхинүүд харгы заhабарилха ба болбосон түхэлтэй болгохо ажал хэhэн байна. Мемориальна хүшөө руу ошоһон харгы, хорёонь заhабарилагдаа, санитарна сэбэрлэлгэ үнгэргэгдөө.
   Нёдондо Арын-Булаг һууринда шэнэ худаг баригдаһан байна. «Хила» хүдөө hууринай захиргаанай, hургуулиин болон соёлой байшанай хүдэлмэрилэгшэдэй туhаар Учительская гудамжада оршодог стадион заhабарилагдаа: 10 столб, 5 прожилина hэлгүүлэгдээ, штакетнигүүд шэнэлэгдээ, заhабарилагдаhан хорёо сагаадагдаа hэн. Станци Ага соо Чимитдоржиной нэрэмжэтэ гудамжаар авто-унаагай харгы баригдаа. Булаг станцида худаг заһабарилагдаа юм.
   Балдан-Доржи Дамдинович иигэжэ хөөрэнэ: «Долоон хоног бүхэндэ хүүгэдэй наададаг талмайнууд сэбэрлэгдэжэ, өөдэнь татагдажа байдаг. Июнь hарада «Чистая река» акцида нютагай таби гаран хүн хабаадаhан байна. Тэдэ Ага голойнгоо эрьеэр гурбан модо зай арилгажа, 4 микрогрузовик ба тэргэтэй 4 трактораар бог шорой хаяа.
   Хүдөө hууринай дэбисхэр дээрэ Хүрэлжын, Арын-Булагай ба станци Агын хүүрэй газарнууд бии. Минии hанамжаар, нүгшэhэн зондо амиды зондо адляар хандаха ёhотойбди. Ажаhуугшадhаа суглуулhан 100 мянгаад түхэригөөр материал абажа, хорёонуудыень заhабарилаабди, сагаадаа, шэрдээбди, 100 гаран столб hэлгүүлэгдээ. Хагда тармажа хаяабди».
   «Сады памяти» гэhэн бүхэроссиин акциин хэмжээндэ 160 нарhан таригдаа, палисаднигууд заhагдаа, сагаадагдаа. Жэл бүри жаран хуби ажаһуугшадые уһаар хангадаг зунай водопровод заhабарилагдадаг.
   Станци Ага, Арын-Булаг, Хүрэлжэ hуурингуудта хүүгэдэй талмайнууд зохёогдонхой. Мүнөө жэл «Формирование современной городской среды» программын хэмжээндэ «Универсальная спортивная площадка» түлэблэл бэелүүлэгдэжэ, hургуулиин хажууда 3 сая түхэригэй тамирай талмай баригдаа.
   Нютагай ажаһуугшад хабар ба намар хүдөө hууринаа сэбэрлэхэ, болбосон түхэлтэй болгохо талаар ажал ябуулдаг, санитарна сэбэрлэлгын үедэ 500 мэшээг бог шорой хаягдаа. Һуурин орхигдоhон огородуудай адаалхай проволокоhоо сэбэрлэгдээ.
   Нютагай ажаһуугшад һууринаа сэбэрлэхэ ниитэ хэрэгтэ харюусалгатайгаар хандажа, эдэбхитэйгээр хабаададаг. 2021 оной дүнгүүдээр, Хила һуурин аймаг дотороо ариг сэбэрлэлгээр ба болбосон түхэлтэй болголгоор 2-дохи һуури эзэлһэн байна. 2022 ондо түрүү hуури эзэлжэ, мүнгэн шангаараа Остречная hууринда хүүгэдэй наадаха талмай түхеэрһэн.
   Хилынхид зун ба намар улһа (конопля) сабшажа усадхадаг. Жэшээнь, 2021 ондо 1 гектар дэбисхэртэ, харин 2022 ондо 5,65 гектарта.
   Түймэр hэргылхэ зорилготойгоор жэл бүри бүхы нютаг hуурингуудые тойроод, минерализованно зурууд хахалагдадаг. Түймэр hэргылгын ажал үргэнөөр ябуулагдадаг байна. 2022 ондо олон хүүгэдтэй, эрэмдэг ба хүндэ хүшэр байдалда ороhон ба бусад зондо түймэр тухай зарладаг 54 түхеэрэлтэ тодхогдонхой (оповещатель).

ГЭРЭЛТҮҮЛГЭ
   Хүдөө hуурин болбосон түхэлтэй болгохо үйлэ хэрэгүүдэй нэгэн гэхэдэ, үйлсэ гэрэлтүүлгэ болоно. Станци Агада федеральна ба түмэр харгынуудһаа гадна газаа 79 фонарь гэрэлтэдэг. Энээндэ онсо анхарал хандуулагдадаг. Зон гэрэлтүүлгэтэй байжа hураа, эндэ тэндэ аhанагүй гэжэ мэдүүлжэ, зарга оруулжа байдаг юм. Хүрэлжэдэ үйлсын 5-6 фонарь аhадаг. Жэл бүри үйлсын ба харгын гэрэлтүүлгын зай ута болодог. Захиргаан гэрэлтүүлгын шанар ходо hайжаруулхые оролдодог. Жэшээнь, долоон хоног бүхэндэ фонарьнуудай лампочканууд шалгагдажа байдаг юм.
   2021 ондо 28 шэнэ фонарь тодхогдоо, 12-ынь hэлгүүлэгдээ. Мүнөө жэл һуурингуудта баһал фонарьнууд, 9 лаампа hэлгүүлэгдээ юм.

(Үргэлжэлэлынь 1-дэхи дугаарта уншахада болохо).

Нордоп БАБУЕВА.

You have no rights to post comments