- Виктор Станиславович, өөртэеэ танилсуулыт.
- Буряад Уласай Баргажанай аймагай Улюн нютагта тоонтотойб. Арбан наһатайдаа Улаан-Үдэ ерэжэ, Лариса Сахьяновагай ба Пётр Абашеевэй нэрэмжэтэ хореографическа колледждо орожо, РСФСР-эй арадай артист Виктор Александрович Ганженкын класста һурааб. Һүүлээрнь Гомбожап Цыдынжаповай нэрэмжэтэ оперо ба баледэй театрта ажалда ороо һэм. Хоёр жэл хүдэлөөд, баледэй гол хатаршаниинь болоо бэлэйб. Мүнөө театртаа 18-дахи театральна хаһа эхилбэб. Театрта хүдэлхэ үедөө 2011 ондо Зүүн Сибириин гүрэнэй соёлой ба урлалай академи амжалтатай дүүргэжэ, педагог-хореографой мэргэжэлтэй болонхойб.
- Хэды хүн ерээбта?
- Елена Викторовнаһаа гадна Буряад Уласай арадай артистнар Вероника Миронова, Булыт Раднаев бидэ дүрбэн энэ ехэ удха шанартай хэмжээ ябуулгада ерээбди. Булта Лариса Сахьяновагай ба Пётр Абашеевэй нэрэмжэтэ хореографическа колледж дүүргээд, Улаан-Үдэдэ оперо ба баледэй театрта хүдэлдэг, тайзанай гол мастернууд болонобди. Театрта хүдэлхэеэ ерэхэдэмни, Елена ба Вероника хоёр нэгэ хэды жэл хүдэлһэн, дүй дүршэлтэй болоһон байгаа. Тэдээнтэй хатархань, репертуарта орохонь бэлэн байгаа һэн. Мүнөө тэдэ минии дүтын нүхэд болонхой, намайе дэмжэжэ, дэлхэйншье захада ошолсохо бэлэн шуу. Хүндэтэ Намжилма Цыренжаповна хадам эжынгээ урилгаар мүнөө эндэ нүхэдтэеэ ерээд байһандаа баяртайб.
- Танай репертуар баян бэзэ даа?
- Минии гүйсэдхэдэг партинууд гэхэдэ, Лев Книпперэй, Бау Ямпиловай «Красавица Ангара», Пётр Чайковскиин «Лебединое озеро», Борис Асафьевай «Бахчисарайский фонтан», Людвиг Минкусэй «Дон Кихот» г.м. Тоолохо болоо һаа, үшөө олон.
- Гэр бүлэ тухайгаа хөөрэжэ үгыт.
- Наһанайнгаа нүхэр Виктория Болотовнатай 2008 ондо танилсаад, гэр бүлэ болоо һэмди. 2009 ондо ехэ Сахьяна басаган мүндэлөө, 2011 ондо – Соодой хүбүүн, 2017 ондо – одхон Саялин басаган.
- Нүхэртнай мэргэжэлээрээ баһал уран урлалда хабаатай гү?
- Виктория экономист мэргэжэлтэй. Мүнөө гэртээ хүүгэдээ хүмүүжүүлнэ. Нүхэрэймни сүлөө сагтаа бэеэ һа-мааруулха шунал гэхэдэ, ород хэлэн дээрэ шүлэг зохёохо дуратай.
- Орьёл хада уулын хүбүүндэ Агын элдин тала ямар байнаб?
- Байгал руу урдан ородог, элдэб олон загаһаар баян Баргажан гол байха, хадын голнууд элбэг. Баргажан нютагайм орьёлнуудай үзэмжэ һайхан. Агын нэмжыһэн үргэн тала баһал гоё. Талын дунда зохёогдоһон тайзан дээрэ хатарбабди, саанань – баян ургасатай сабшалан, хуряагдаһан үбһэн. Ехэл һайхан байгаалиин үзэсхэлэн даа.
- Хаагуур гастрольдо ябаһан байнабта? Таанадые ямараар угтадаг бэ?
- Россиин Шэтэ, Эрхүү, Владивосток г.м., 2008 ондо Украинын Днепропетровск, Донецк хотонуудаар, Итали, Япони г.м. хари гүрэнүүдээр хатараа харуулжа, арадайнгаа соёл дэлгэрүүлжэ ябаабди. Хайшаашье ошоходомнай, танхимаар дүүрэн харагшад суглардаг, һайнаар угтадаг.
- Ябаһан газарнуудаартнай буряадууд харахаяа ерэдэг гү?
- Ерэдэг. Москвада Сагаалганда концерт-наада хоёр үдэрэй туршада харуулхадамнай, хахад танхим буряадууд һуужа байгаа һэн. Кремлиин Ордоной танхим 2000 һууритай. Ехэ зохид байгаа, концерт үндэр хэмжээндэ үнгэрөө бэлэй. Хари гүрэнүүдтэ буряадууд үсөөхэншье һаа, наадыемнай харахаяа ерэдэг.
- Гастрольдо олон артистнар ошодог гүт?
- Дүрбэн зүжэг, нэгэ гала-концерт харуулдагбди. Балетнэ труппа соо 50 хүн, оркестрэй – 40 хүн, оперын 10-аад артистнар – хамта 100-гаад хүн буряад арадайнгаа урлалтай танилсуулжа ябадагбди.
- Танай түсэбүүд ямар гээшэб? Саашадаашье ерэжэ, харагшадые хужарлуулжа байха бэзэт?
- Наһанай амаралта хүрэтэр 3 жэл үлөө, хүдэлжэл байхабди. «Хатан эжы» жэл бүриин хэмжээ ябуулга болоо хадань концерт-наадан үнгэргэгдэхэ. Олон харагшадые хабаадуулжа, үргэн дэлисэтэйгээр эмхидхэхые оролдохобди. Саашадаа бага зүжэгүүдые табиха түсэб байна.
- Һайнта даа.
- Елена Викторовна, хаанаһаа уг гарбалтайбта?
- Эжым Эрхүүгэй можын Боохоной аймагһаа гарбалтай, абамни – Хяагтын. Колледжын һүүлээр 1996 онһоо 2001 он болотор Краснодарай «Премьера» гэжэ зохёохы эмхиин баледэй артистаар хүдэлөөб. 2006 ондо Зүүн Сибириин гүрэнэй соёлой ба урлалай академи дүүргэһэнби. Гадна Буряадай хореографическа колледждо багшалдагби, буряад урлал хүгжөөхэ, ургажа ябаһан залуушуулда дамжуулха хэрэг бэелүүлнэ болоноб. Тайзан дээрэ 26-дахи жэлээ хүдэлнэб.
- Түрүүшынхеэ талын дунда хатарба гүт? Ямар мэдэрэл түрүүлнэб?
- Бидэ гастрольдо ябахадаа, элдэб талмайнуудта хатардагбди. Харин талада сэбэр агаарта түрүүшынхеэ хатарбабди. Жэгтэй һонин байна.
- Ямар номернуудтай ерээбта?
- Бидэ «Красавица Ангара», «Пиар Юкки», «Корсар», «Глюк» гэһэн баледһээ хэһэгүүдые харуулаабди. Харагшад халуунаар угтан абаа.
- «Хатан эжы» этномастерской тухай танай һанамжанууд.
- Баярай оршондо аяншалгын түбэй нээгдэжэ байхада, олон хүнэй хабаадаһаниинь һайшаалтай. Һэеы гэрнүүд соохи үзэсхэлэнүүд ехэ һонирхолтой. Урдын ёһоор буйлуулһан сагаан эдеэн анхаралыемни ехэ татаа. Шэрээ элдэб янзын сагаан эдеэгээр билтаржа байха юм. Арад зоной заншалаа мэдэжэ, хадагалжа, дэлгэрүүлжэ байһаниинь ехэ сэнтэй.
- Хүүгэдтэ хэды наһатайһаа баледтэ ябажа эхилхээр бэ?
- Хатарай кружогто, гимнастикада эртэ ябажа эхилээ һаань, хүгжэлтэдэнь бүри бэлэн байха. Һүүлдэнь баледэй мэргэжэлтэ артист болохынь тула хореографическа колледждо һурахыень уридагбди. Үхибүүн 4-дэхи анги дүүргээд, маанадта орохо аргатай.
- Хүдөө нютагай хүүгэдтэ байра үгтэдэг гү?
- Ондоо тээһээ ерэһэн хүүгэд хамтын байраар хангагдадаг. Тэдэниие хооллуулдаг, хүмүүжүүлэгшэдэй харууһан доро һурадаг юм. Дүүргэхэдээ, тэдэ тусхай дунда һургуулиин диплом абажа гарадаг. Тиигээд оперо ба баледэй театрта хүдэлхэ аргатай болодог шуу. Хэрбэеэ тэдэниие ондоо театрнуудта урибал, тэндэ хүдэлхэдэ болохо. Манай колледж дүүргэһэн олон хатаршад Россиин элдэб хотонуудта болон хари гүрэнүүдтэ хүдэлдэг.
- Яагаад иимэ жэбжэгэр гоё бэетэй байхаб?
- Хүн бүхэн бэеын элдэб түхэлтэй байдаг ха юм даа. Бэлээр таргалдаг хүн эдеэ хоолоо хизаарлаха болоно. Мүнөө, юрэнхыдөө, зон ажабайдалай элүүр энхые сахидаг болонхой гээшэ ааб даа. Зүбөөр эдеэлхэ, муу журамуудаа (вредная привычка) орхихо хэрэгтэй гэжэ һананаб. Колледждомнай хатарай студи бии, тэндэ хүүгэд бэлэдхэл гараха аргатай. Урид үхибүүд шэлэлгэ гарадаг. Нэн түрүүн хүдэр, элүүр энхэ бэетэй болон баледтэ хатарха һайн физическэ шэнжэтэй байха ёһотой.
- Харюунуудые үгэһэндэтнай, баярые хүргэнэб.
Нордоп БАБУЕВА.
