Долгорма Долгоржаповае гүлмэр залуухан наһанһаа мэдэхэб. 1983 ондо Эрхүүгэй гүрэнэй университедэй буряад хэлэ бэшэгэй таһагта суг ороо бэлэйбди. Тиихэдэ обтой согтой даа, энеэдэтэй зугаатай үйлэ хэрэгүүдые үүдхээд лэ байдаг, суг һурадаг нүхэдэйнгѳѳ дунда абаһаар хүндэтэй болоһон, аашатайхан басаган ябаа. Бүри 1-дэхи курсын оюутан байхадань, Долгормагай юумэ зохёохо, найруулха талан бэлигынь тодороо: оюутадай сүлѳѳ темэдэ бэшэһэн эрхим ажалнууд, тэрэ тоодо Долгормагай эхэ тухай бэшэһэн найруулга “Буряад үнэндэ” толилогдоо һэн. Теэд энэ һургуулияа Долгорма дүүргээгүй. Залуу даа, замайнгаа эхиндэ ябаһан, наһанайнгаа нүхэр Бальжир Цыренович Долгоржаповтай золгоод, Алхана нютагай бэри боложо, эхэнэр хүнэй жаргал эдлээ.
Режиссёрнууд: Д. Димчиков (баруун гарһаа), Б. Загдаева, Д. Долгоржапова, Р. Цыдендоржиев (жюриин гэшүүн), Б. Цыденов, Д. Батуев, Б. Бальжинимаев (жюриин түрүүлэгшэ).
Бэлигтэй хүн дүрбэн тэгшэ байдаг гээшэ үнэхѳѳрѳѳл хаш. Нэгэ курсда һураһан ханимнай мүнѳѳ мэдээжэ режиссёр болонхой. Уран зохёол бэшэдэг, дуу дууладаг, хэмжээ ябуулгануудые хүтэлдэг, харин тайзан дээрэ наадахыень хараһан хүн артистын арга шадабарииень үндэрѳѳр лэ сэгнэхэ байха. Долгорма Мункуевна Зүүн Сибириин соёлой ба искусствын академии дүүргэжэ, «Режиссёр самодеятельного коллектива. Преподователь народно-художественного творчества» гэһэн мэргэжэлтэй болоһон. 1990 онһоо 2014 он болотор Алханын соёлой байшанай уран һайханай хүтэлбэрилэгшѳѳр ажаллаа. Нютагайнь драмколлектив Д.Долгоржаповагай хүтэлбэри доро 1991 ондо аймагай, удаань тойрогой хэмжээндэ анха түрүүшынхеэ лауреадай нэрэ зэргэдэ хүртэһэн байна. Саашадаа Алханын драматическа коллектив, режиссёрыньшье жэл бүри элдэб харалга-мүрысѳѳнүүдтэ илажа, холо ойгуур нютагаа суурхуулһан гээшэ. Долгорма Долгоржаповагай ударидалга доро Могойтын аймагай Ага-Хангилай драматическа коллектив амжалта туйлаһан габьяатай. Ага-Хангил хадаа тоонто нютагынь юм. Эндэл ерээдүйн режиссёр 1965 оной августын 7-до газар дэлхэйн шарай хараһан. Нютагайнгаа дунда һургуули түгэсхэһэнэй удаа тэрэ үүринэртэеэ суг комсомол-залуушуулай фермэдэ ажаллахаяа үлэжэ, түрэл колхозойнгоо хүгжэлтэдэ багаханшье һаа хубитаяа оруулһан хүн гээшэ.
Дэлгэрэнгыгээр 47-дохи дугаарта.
