Лев Толстой. Тула хотодо Лев Толстойн гэр бүлынхидтөө зорюулжа бэшэһэн «Плоды просвещения» гэһэн зүжэг табижа, авторыень уриһан байгаа. Харин театр ороходонь, үүдэндэ зогсоһон харуулшан өөрынгөө харгыгаар ябахыень ойлгуулаад, тэрэниие саашань табибагүй: Лев Николаевич юрын лэ хүдөөгэй хүнэй хубсаһа үмдөөд ерээ ха юм.
   Л.Толстой тоосолдоншьегүй, холо бэшэ ошоод һууба. Театр ерэһэн хотын дарга зохёолшые хаража гайхаад, юу хэжэ һууһан тухайнь һураба.
   «Һуунаб даа. Зүжэгөө хараа һаа гэжэ һанаһамни, табинагүйл даа...» – гэжэ миһэрэн ойлгуулба.
   Эмхидхэгшэд ехэ аягүйрхэбэ, тэрэ харуулшан яажа «һунаалгааб» гэжэ тухайлхаар бэзэ.
   Артур Конан Дойл. Парижда дэлхэйн эгээ суута тагнуулшан тухай бэшэһэн уран зохёолшотой энеэдэтэй ушар болоһон байна.
   Артур Конан Дойлой поездһоо буухада, таксист угтажа, чемоданииень авто-унаадаа хээд: «Конан Дойл, таниие хайшан абаашахабиб?» – гэжэ һураба.
   Уран зохёолшо «хаанаһаа намайе нюураарни таниба гээшэб» гэжэ гайхаба.
   Тиихэдэнь таксист: «Холмсой дедуктивна онол арга шудалааб, олон зүйлнүүдыетнай шэнжэлбэб: хургандатнай бэхын толбо байна, тиимэ хадаа ехээр бэшэдэг хүн байнат гэжэ эли, эмшэн мэтээр зогсонот, зүгөөр хубсаһантнай лондоной маягтай», - гэхэ мэтэ олон юумэ хэлэбэ.
   Конан Дойл гайхаба: «Та ёһотой Шерлок Холмс байнат!»
   Тиихэдэнь жолоошон аягүйрхэжэ: «Би нэгэ зүйл адаглааб: чемоданайтнай ярлаг дээрэ танай нэрэ обог бэшээтэй».
   Владимир Маяковский. Нэгэтэ Владимир Маяковский ээлжээтэ диспудта пролетариин национализмын сэдэбээр зүбшэлсэжэ байгаа. Тэрэ өөрыгөө дэлхэйн хүнби – ородууд соо ородби, грузинуудай дунда грузинби гэжэ мэдэрдэг тухайгаа хэлэбэ.
   Тиихэдэнь нэгэ хүн танхим сооһоо: «Үбэштэй зон соо хэнби гэжэ мэдэрдэгбта?» – гэһэн ха.
   Маяковский тээлмэрдэнгүй: «Үбэштэй зон соо түрүүшынхеэб», - гэжэ харюусаһан юм.
   Марк Твен. Энэ хүн анхаралгүй, һаамагар хүн байһан, тиимэһээ элдэб уршагта ябадалнуудта ородог һэн.
   Нэгэтэ поезд соо ябахадань, шалгагша ороо. Твен бүхы хармаанууд соогоо биледээ бэдэрбэ, тэрэниинь яашье олдобогүй. Һүүлэй һүүлдэ контролёр хайрлаад, һөөргөө бусахадаа шалгаха тухай хэлэбэ.
   «Олдоошьегүй һаань, аймшагтай юумэн үгы» гэжэ хэлэхэдэнь, Твен зүбшөөбэгүй: «Үгы, би заатагүй энэ зоболонто билет олохо ёһотойб! Үгы һаа, хайшаа ошожо ябаһанаа яагаад мэдэхэбиб?!»
   Жан Лафонтен. Нэгэтэ Франциин басни бэшэдэг Жан Лафонтенэй һамган үбгэнэйнгөө бархиржа байхада орожо ерэһэн ха. Тэрэнь ажалайнгаа столой саана һуугаад, амаргүй һугшаржа байба. Юун болоод уйлаһан тухай һурахадань, Лафонтен харюугай орондо туужынгаа хэһэг уншажа үгөө. Тэрээн соонь туужын герой бэрхэшээлнүүдые дабажа ядажа, дуратай басагаяа һамга абаха аргагүй байба. Лафонтенэй һамган уйлажа байгаад, үбгэеэ гуйба: «Дуратай басагантайнь ниилүүлыш даа». Тэрэнь: «Аргагүйб! Һая түрүүшын боти бэшэжэ байналби», - гэбэ.

You have no rights to post comments