Мүнөөдэр ород литээр октябриин 1, Монгол һарын 15.
Улаан гал үхэр үдэр.
Үһэ хайшалжа болохогүй.
Бишэн, тахяа жэлтэй зондо - һайн үдэр.
Бар, туулай жэлтэй зондо - хуби заяанай һайн үдэр.
Үхэр, луу, хонин, нохой жэлтэй зондо - муу үдэр.
Богдо Захавые хүндэлхэ үдэр. Ламчин Нинбо- хурал дасануудаар үнгэрхэ. Мэгзэм уншажа ябахада - һайн. Мүнөөдэрэй хэһэн ябадалнууд оло дахин үдхэгдэхэ. Тиимэһээ бэеынгээ энхэ элүүрые, хэлэ амаяа, ухаагаа адаглажа ябахаар. Хэһэн муу ябадалаа һанажа, маани уншажа байхаар. Үргэл хэжэ ябахаар. Һуралсал эхилхэдэ - ехэ һайн. Зүбшөөл болон заабари үгэхэдэ ба абахада, харгыда гарахада, эм бэлдэхэдэ, хүдө ажахыда, гэрэйй һуури табихада, барилгада - таарамжатай үдэр.
Гэрһээ бог шорой, нобшо гаргахада болон шатаахада - муу. Зондо аягүй байдал үүсхэхэдэ болон үбшэнтэй болгожо болохогүй.
Мүнөөдэр хүбүүн түрөө һаа - һаруул ухаатай, эрдэм бэлигтэ амжалтатай хүн байха. Басаган түрөө һаа - ута наһатай, зондо туһатай хүн болохо.
