Энэ заншалай гол удхань хадаа хүбүүтэ айлай
басаганай гэртэхиндэ ошожо, бурханда хадаг
табиха ёhо болоно. Тиихэдээ бурханда зула
бадараажа, сай, сэржэм, тахил үргэдэг.
Урдань үри хүүгэдэйнгээ гэрлэлгэ, гэр бүлэ болохо ябадалые эхэ эсэгэнь шиидхэдэ байhан. Нэн түрүүн, буряадууд хоёр залуушуулайнгаа уг гарбал, түрэл түтимынь харадаг байгаа. Нэгэ угай зон хоорондоо шуhаяа холингүй, ондо ондоо омогойхид ниилэжэ, гэр бүлэ болоо hаа, үри хүүгэдынь өөдэргэ, шанга бэетэй, ухаан бодолоор hонор, дүрбэн тэгшэ хүн болодог гэжэ хэлсэдэг байгаа.
Олон үнгын хадагууд - Агын дасанай наймаада. Авторай фото-зураг.
Тиимэhээ элинсэг хулинсагнай олон үеын угай бэшэг бүрин бүтэнөөр хадагалжа, саашань нарибшалан бэшэжэ, холын хараа бодолтойгоор үри хүүгэдтээ дамжуулдаг байһаниинь һайшаалтай даа. Саарhан дээрэ аржытар бэшээтэй уг гарбалаа мүнөөшье угай бэшэг соо хараха аргатайбди. Түрэл гарал, дүтын зоной шуhа холижо болохогүй гэhэн ёhо гурим үбгэ эсэгэнэр, дээдэ үеынхид шангаар сахидаг байгаа. Тэдэнэй аша туhаар мүнөө буряад арад бэе тамир hайтай, эрдэмдэ улигтай, сэдьхэл бодолоор тэгшэ ябана гэхэдэ, алдуугүй бшуу. Энээниие залуушуул хадуужа абаха ёhотой.Тиихэдэ хуби заяагаа ниилүүлхэ хүсэлтэй хүбүүн басаган хоёр дасан дуган ошожо, зурхайда хуби заяагаа харуулаа һаа, һайн гэжэ аха захатан хэлсэхэ байна. Зурхайша лама залуушуулай түрэhэн он жэлнүүдээрнь, hуудал, мэнгээрнь тааралдуулан номоо хаража, ехэ сэсэнээр хэлэжэ үгэдэг. Зурхайгаар бэе бэетэеэ тон тааранагүйт гэжэ хэлүүлээ hаа, гэр бүлэ болоhоной хэрэггүй, энэ наhандаа дүтын нүхэд ябаа hаа, дээрэ. Юумэн урагшатай, үри хүүгэдэй hүлдэ, зөөри, ажал, ажабайдал hайн байха гэжэ зурхайда гараа hаань, нэн түрүүн хүбүүтэ талын аха захатан, түрэлхид бэри болохо басаганай гэртэхиндэ ошожо, эхэ эсэгэһээнь зүбшөөл hурадаг, бурхандань хадаг табидаг. Тиигэхынгээ урда тээ тэдэнэр дасан ошожо, хадаг табиха hайн үдэр, саг харуулдаг. Мүнөө залуушуулай дунда«хулууха» гэhэн буряад зоной заншалда таарамжагүй, буруушаахаар ёһо бии болоо. Энэ юун тухай хэлэгдэнэб гэхэдэ, инаг хоёр гэр бүлэ болохомнай гэжэ хоорондоо хөөрэлдэжэ шиидээд, басаган хүн гэртээ ерээд, «мүнөө үдэшэ намайе ханилһан гансамни хулуухань, нүхэдни ерэхэнь, амтан эдеэгээ бэлдэжэ, гоё шэрээ бэлдэгты» гэжэ аба эжыдээ, аха дүүнэртээ хэлэдэг.
Дэлгэрэнгыгээр 41-дэхи дугаарта.
