Тойрогой таряашад ургаса хуряана.
Хүдөө ажахынхид ургаса хуряалгын ажалда үдэрhөө үдэртэ шармайна. Хура бороотой энэ жэлдэ таряан һайнаар ургаа. Октябриин 6-ай байдалаар, таряа хуряалгын ажалай жаран хуби тухай дүүрээд байба.
Тодорхойлходо, Агын аймагай таряашад 2600 гектар талмайһаа гурба мянга хахад тонно орооһото культурануудые хуряагаад, тоог руугаа оруулна бшуу. Хуряагдаһан таряанай диилэнхи хубинь обёос болоно. Нэгэ гектарһаа дунда зэргээр 15,5 центнер ургаса абтаа. Аймаг дотор эгээл эрхим дүнгүүдые «Хүнхэр» ажахы харуулна. Тус ажахын таряашад 1580 гектар талмайһаа 2695 тонно ургаса хуряагаад, тоог руугаа шэрэжэ орууланхай. Ганса шэниисэ 1395 тонно хуряагдаа. Байгша ондо хүнхэрэйхид «Догой» гэжэ нэрэтэй һайн ургаса үгэдэг хүрэнгэ һуулгаһаниинь, баян ургаса абтаба. Үмсөөрөө таряа ургуулдаг Сувор Батомункинай, Баир Дондоковой ажахынууд түсэбтөө хүрэмэ алтан шаргал таряа хуряажа байнхай.
