«Родина» үүлтэртэ ажахын хони үсхэбэрилгэдэ ажалай баян дүршэлтэй зон хубитаяа оруулдаг юм.
Тус ажахыда хамтын ажалай түлѳѳ нэтэрүү шударгыгаар хүдэлжэ, нэрэ солотой болоhон ба боложо ябаһан хонишод олон юм. Дүй дүршэлтэй малшан - Дамдин Дашипильчинов Алёна нүхэртэеэ арба гаран жэл хонин ажалда хүдэлжэ, түрэл ажахынгаа хонидые арьбажуулжа ябана бшуу. Дашипильчиновтэн Зүдхэлиhөө хэдэн модоной зайда оршодог Нарин Хүндын эхиндэ агын үүлтэрэй 450 гаран буряад хони харууhална. Буусын эзэн Дамдин Дашипильчиновтэй уулзаhамнай, хонишод үбэлжэлгэеэ бараг хэмжээндэ дабажа, хүдөө ажахыда эхи абажа байһан хонидой түрэлгын ажал хэрэгүүдтээ барагсаан бэлдэжэ байна. Дулаан үбэл боложо, малшадта хоол хошо элбэг. Үнгэрэгшэ намар малайнгаа хоол гүйсэд нөөсэлһэн байба. Малшад өөһэдөө үбһэ сабшаа ба ажахынь буулгаа бэлэй. Дашипильчиновтэн өөрын трактор техникэтэй. Ажахын хүтэлбэри хонишодоо шэнгэн түлишѳѳр, трактор техникын нөөсэнүүдээр хангажа байдаг. Түрүү хонишон жэл бүри зуун эхэ хонинhоо зуу гаран хурьга абажа, түрүүшүүлэй тоодо ябадаг. Эгээл олоор зууhаа зуун хорин нэгые абаhамди гэжэ хонишон хэлээ. Хэды жэлэй саана Д.Дашипильчинов түл абалгаар эрхим дүн харуулжа, Дулдаргын аймаг соогоо зуутан хонишодой дунда абарга болоһон байха юм. Тиигэжэ хитад трактор шанда хүртөө һэн. Мүнөө жэлшье бууса дээрэнь түл абалгын ажал үндэр хэмжээндэ эмхидхэгдэхээр түсэблэгдэнэ. Апрелиин эхеэр хонидой түрэлгэ эхилхэ. Тэрэнэй даашада үсхэбэрилэгдэдэг эхэ хонид байгша ондо дүрбэдэхи жэлээ түл үгэхэнь гээшэ. Сакман соогуур хонишодто хамһалсаха зон бии гэжэ ойлгогдоо. Түрэл гаралаа хэлэхэ, үгы һаа ондоо тээһээ зониие хэлэжэ, түл абалгада хамһалсуулдаг байна. Хэзээшье ажалай дүүрэхэдэ, хони хурьгаар урмашуулдаг юм. Хонидойнь хашаар үнихэнэй болоһоншье һаа, досоонь дулаан. Досоо газаагүй сагаадагдаhан. Ажахы хонишодто фураж, зелёнко буулгадаг. Түрэлгын урда тээ эхэ хонидтоо үдэр бүри зелёнко эдюулжэ, дабhа долёолгожо, бэеын тэнхээ тамирыень алдуулнагүй. Түрэхэ хонид шадалтай байха ёhотой.Үдэр бүхэндэ бэлшээридэ туужа гаргадаг. Үдэшэлэн хагда ногоо эдеэд ерэһэн малда үбһэн тараагдадаг. Хонишон үглөө бүхэндэ мориндоо мордоод, малаа адуулхаяа гарадаг. “Малаа хойноһоонь дахажа, адуулжа байха хэрэгтэй. Хүдөөгэй арьяатанай малда добтолхо ушарнууд олон. Зүдхэлидэмнай шоно элбэг. Мал мэгдэхээнэ. Һүниндөө малаа манаха ушарнууд һайсал гарадаг”, - гэжэ Дамдин Дылгырович хөөрэнэ. Тэдэнэй буусада уhаар хангалгын талаар асуудал гарадаггүй. Газаагаа зайн галаар ашаглагдадаг худагтай. Ажахын түрүүлэгшэ Дарима Дондокова, зоотехник, малай аргашад малшадайнгаа бууса мэнэ-мэнэ болоод эрьежэ, ажабайдалыень хаража байдаг. Дутуу дундануудыень хүсэлдүүлэн, зүб тээшэнь шиидхэлсэдэг. Тиимэhээ хонишод ажахынгаа хүтэлбэридэ, гол түлэб, түрүүлэгшэдээ ехэ баяртай байдаг. Малай түрэлгын түгэсэхэдэ, хүдөө ажахын мэргэжэлтэд шэнэ түлөө тооложо гуримшуулдаг, эрхим хонишодойнгоо нэрэ обогуудые элирүүлдэг гээшэ.
Дэлгэрэнгыгээр 12-дохи дугаарта.
