Таряалан полинуудаар тэжээлэй болон орооhото культурануудай хүрэнгэ тарихаар саг ойртобо.
Айлшад Калининай нэрэмжэтэ ажахын техникэ харана.
“МОЛОДЁЖНОЕ” СТАН ДЭЭРЭ ХҮЛГӨӨТЭЙ
Эндэ һая Калининай нэрэмжэтэ ажахын (Үбэр Аргалиин) таряа ургуулдаг стан дээрэ Агын аймагай хүдөө ажахынуудай таряашад сугларжа, хабарай тарилгын асуудалаар зүблөөндэ хабаадаа. Анханда “Молодёжное” гэжэ нэрлэгдэдэг байһан суута полевой стан дээрэ Калининай ажахын таряашад орооһото культурануудые ургуулгын ажал ябуулдаг. Хүрэжэ ерэхэдэ, тарилгада хабаадуулагдаха трактор техникэнүүд: К-700, Т-150, КамАЗ, сеялкэ, анзаһан жэрылдэн татаатай байба. Эдэ унаа техникэнүүдые жолоодохо механизатор хүбүүд хажуугаарынь зогсоно.
“Механизаторнуудай оролдолгоор техникэмнай ябадаг. Барандаа хуушарһаншье һаа, мүнөө ашаглагдана. Үнгэрэгшэ зуун жэлэй ная гаран онуудта гаргагдаһан тракторнууднай мүнөө маанадайнгаа урманда ябажал байна”, - гэжэ Калининай нэрэмжэтэ ажахын түрүүлэгшэ Валерий Хандаков айлшадта хөөрэнэ. Механизаторнууд техникэ зэмсэгүүдээ заһабарилаад, тоһодоод, тоншоод, поли дээрэ гарахыень бэлэн болгонхой. Валерий Андреевичэй хэлэһээр, хуушарһан тракторнуудта мүнөө үедэ гаргагдадаг шүрэбшье таарахаа болиһон. Хуушан түмэр түдэгын нөөсэнүүдые бэдэржэ, тааруулжа ¥ÿ¥ÿ¥ябуулна бшуу. Үнэхөөрөөшье харахада, ашаглагдаха болзорһоо үни гараһан техникэ һайнаар заһабарилһанай урманда ябана. Иимэ байдал ганса Аргалида үзэгдэнэ бэшэ, олон ажахыгаар трактор техникын парк барандаа хуушаранхай. Гушаад жэлдэ Калининай нэрэмжэтэ ажахые хүтэлбэрилжэ ябаһан Валерий Хандаковой аша оролдолгоор тус ажахы таряа ургуулгаар тойрог дотороо эрхимэй тоодо ябадаг юм. Үнгэрэгшэ намар сагай уларилһаа боложо, аргалиинхид түсэбтөө хүрэмэ ургаса хуряагаагүй. Байгша ондо дахяад ган жэл болохо гээд айнгүй, таряалангай талмайгаа нэгэшье бага болгоогүй байна. Ямаршье ажал эрхилхын тула мүнгэнэй нөөсэ хэрэгтэй болодог. Тиимэһээ Калининай ажахы тарилгадаа хүрэнгэ, техникын нөөсэ, шэнгэн түлишэ абаха зорилготойгоор банкһаа 2 сая мүнгэ зээлеэр абаа. Ная мянган түхэригтэ тракторай нөөсэнүүдые худалдажа абаа. “Молодёжное” полевой стан тойроод Аргалиин полинууд нэмжыдэг. Хорёолоотой 500 га газарта 370 га обёос, 130 га зелёнко тарихаар түсэблэнэ. Тиихэдэ 200 га паар бодхооһон. Намартаа амбаар соо хадагалһан 30 тонно обёосой хүрэнгэтэй. Теэд энэ хүрэнгэнь хаанашье хүрэхэгүй. “Хаанаһаа олохобта” гэһэн асуудалда Эрхүүһээ 40 тонно һайн шанартай хүрэнгэ абахаар хэлээ. Мүн суута таряашан Сувор Батомункинай ажахыһаа үшөө 40 тонно хүрэнгэ абаха тухай эртүүр хэлсээ баталһан байгаа. Таряанай ургалгада муугаар нүлөө үзүүлдэг хяаг, үрмэдүүл ногоо хордохо 10 тонно тухай минеральна үтэгжүүлгэтэй. Аргалиин таряашадта 30 тонно шэнгэн түлишэ хэрэгтэй.
Дэлгэрэнгыгээр 19-дэхи дугаарта.
