Сабшалангууд ба таряалангууд дээрэ намарай сүлөөгүй хүдэлмэринүүд зэргэ ябуулагдана.
Хура бороонһоо дулдыдажа, үбһэ сабшалгын ажал нэгэ бага хойшоо болоо. Октябриин нарата үдэрнүүдые һамбаашалан, үбһэшэд тракторһаа бууха забдагүй сабшажал үрдинэ. Үбһэндэ саг соогоо ороһон үмсын болон фермерскэ олон ажахынууд харюусалгата ажалаа дүүргэнхэй. Гэбэшье малай хоол түлэг дундаа бэлдэжэ ябаһан ажахынууд үсөөн бэшэ. Ниитын малда хоол бэлдэлгын, таряа хуряалгын ябасаар һонирхожо, тойрогой Захиргаанай АПК-гай гол мэргэжэлтэн Дамдин Степановта хандаһан байнаб.
Рулонтой үбһэн сабшалангууд дээрэһээ шэрэгдэнэ.
- Дамдин Петрович, малда үбһэ тэжээл бэлдэлгын ажал хэр ябажа байнаб? Дүүрэхэ дүтэлбэ гү?
- Мүнөөдэрэй байдалаар, тойрогой ажахынуудта 32136 толгой мал тоологдоно. Эдэ малаа ядамаргүй үбэлжүүлхын тула хамтын, фермерскэ, үмсын хамһабариин ажахынууд малда 65801 тонно хоол нөөсэлхэ даабаритай. Октябриин эхеэр 49871 тонно үбһэн сабшагдаад байна. Энэ болбол хараалһан түсэб 76 хубяар дүүргэгдээд байна бшуу.
- Олон ажахынууд нютагһаа гадуур малай хоол бэлдэнэ. Харин өөһэдын газар дээрээ үлэжэ, үбһэ сабшаһан ажахынууд бии гү?
- Агын аймагаар хараад үзэбэл, «Сахюурта», «Хойто-Ага», «Согто-Хангил», Һүдэнтэ», «Хүнхэр», «Занта», Могойтын – «Победа», «Ушарбай», Кировэй нэрэмжэтэ, «Сагаан-Уула»,«Дружба», «Улаан-Одон», «Бооржогонтой», Дулдаргын – «Эрдэм», «Табтаанай» ажахынууд нютагайнгаа дэбисхэр дээрэ сабшана. Дээрэ нэрлэгдэһэн нютагуудай газар дайдада ногоон ургаа. «Нютагтаа хүрэхэ хоол сабшажа байнабди», - гэжэ тус ажахынуудай хүтэлбэрилэгшэд найдуулна. Теэд диилэнхи хуби ажахынууд холуур гараһан байгаа. «Урда-Ага» ажахын үбһэшэд Бооржын аймагай Южное һууринда үбһэ бэлдээ, мүнөө Могойтын аймагай Сүүгэлэй полигон дээрэ сабшана. Харымай аймагай Урульга, Тэргэтэ руу Калининай нэрэмжэтэ, Шулуутайн нютагай үмсын Бато Цыденешиевэй ажахынууд гаранхай. Гүнэйн үбһэшэд 265 модо гаталжа, Бооржын Ключевская тосхоной сабшалангуудаар 1573 тонно хоол нөөсэлөө. Тэндэһээ Гүнэй хүрэтэр шэрэжэ асархын тула 28 тонно шэнгэн түлишэ хэрэгтэй болохо. Хүршэ будаланайхидынь Оловяннын аймагай Улаан-Сэсэг, Хада-Булаг нютагуудта 1820 тонно үбһэ сабшажа хуряагаад, мүнөө зөөжэ байна. Шэрэжэ асаралгада 18 тонно шэнгэн түлишэ хэрэгтэй болохо гэжэ тус ажахын түрүүлэгшэ Очир Дугаров мэдүүлнэ. Улаан- Сэсэг руу Могойтын Ленинэй нэрэмжэтэ (Зугаалай), «Хүһөөшэ», Дулдаргын «Родина», С.Ойдопов, Ц.Нимажапова фермернүүд ошожо, малай хоол бэлдэһэн байна. Шэрэлгэдэ ехэ гарша гарана бшуу...
Дэлгэрэнгыгээр 41-дэхи дугаарта.
