Хүдѳѳ нютагта ажаһуудаг эхэнэрнүүдэй ээм мүрэ дээрэ хүүгэдээ хүмүүжүүлхын хажуугаар үмсынь хамһабариин ажахын үдэр бүриин дууһадаггүй ажалнууд байдаг гээшэ. Эдэ эхэнэрнүүдэй ажаһуудалда, сэдьхэлэйнь байдалда, хүсэлэндэ олоной анхарал хандуулха зорилготойгоор жэл бүри октябриин 15-да Хүдѳѳгэй эхэнэрнүүдэй уласхоорондын үдэр тэмдэглэгдэдэг болоһон байна.
Хүдѳѳгэй эхэнэрнүүд дэлхэйн бүхы ажаһуугшадай дүрбэнэй нэгэ хуби болодог гэһэн баримта бии. Мүнѳѳ сагта хүдѳѳдэ гүрэнэй эмхинүүдэй үгы һэн тула тэдэнэр гол түлэб лэ үмсынгѳѳ хамһабариин гү, али фермерскэ ажахынуудые байгуулнад. Эгээл иимэ фермернүүдэй бүлэ тухай зураглан хѳѳрэе.
Жамбалдоржиевтанай гэр бүлэ «Нангин бууса» харалгада. Дугарма ШОЙДОКОВАГАЙ фото-зураг.
«НАНГИН БУУСА» ХАРАЛГАДА “Алтаргана-2016” нааданай хэмжээндэ анха түрүүшынхеэ “Нангин бууса” гэһэн буряад зоной хубиингаа ажаhуудал болон ажахыгаа эрхилэлгын эрхим жэшээнүүдые харуулалга эмхидхэгдээ бэлэй. Энэ конкурсдо хабаадаха фильмүүдые бэлдүүлхэдээ, бэрхэшүүлэй жэшээ харуулха гэһэн зорилго эмхидхэгшэд табиһан байна. Энэ зорилгонь гүйсэд бэелүүлэгдээ гэжэ һанамаар. Буряад ороной Хориин үргэн талада Амгаланта нютаг бии юм. Амгалантын фермернүүд болохо Жамбалдоржиевтанай гэр бүлэ “Алтаргана-2016” нааданай “Нангин бууса” харалга-конкурсын лауреадай нэрэ зэргэдэ хүртѳѳ бэлэй. Жаран таба–жаран зургаа наһандаа ябаһан Баян Жалсанович Зоя Акимовна хоёр “Баян” гэһэн таряашанай-фермерскэ ажахы 15 жэлэй саана байгуулһан байна. Мүнѳѳ ажахыень Сокто хүбүүниинь толгойлно. Бүхыдѳѳ үнэр баян Жамбалдоржиевтанай бүлэ найман хүбүүдтэй, нэгэ басагатай айл, мүнѳѳ фермерэй ажахыдаа зургаан хүбүүдтэеэ сугтаа хүдэлжэ байнхай. “Баян” ажахы тухай дурадхагдаһан фильмһээ ойлгоходо, Баян ба Зоя Жамбалдоржиевтан үбгэ эсэгынгээ байһан бууса дээрэ байдалаа түхеэрһэн байна, энэнь хүдѳѳгэй ажал эрхилэлгынь гол удха болоо. Мүнѳѳ пайнууд гээд газар хубаажархидаг ха юм. Харин Баян Жалсанович Зоя Акимовна хоёр тон үбгэ эсэгынгээ байһан буусада – хооһон тала газарта ерэжэ, ламаар газар гуйлгажа, байра байдалаа зохёоһон байна.
Дэлгэрэнгыгээр 41-дэхи дугаарта.