Агын аймагай соёлой байшан соо ноябриин гурбанай үдэр хүдөө ажахын, болбосоруулгын үйлэдбэриин ажалтадай мэргэжэлтэ һайндэр тэмдэглэгдээ бшуу.
Энэ хэмжээ ябуулгада хүдөө ажахын эрхим ажалтадые, ажалай ветерануудые хүндэлэн амаршалһан байна. 2016 оной «Эрхим үхэршэн», «Эрхим адуушан» нэрэ зэргэнүүдтэ хүртэһэн Могойтын аймагай «Могойтуйский» үүлтэртэ ажахын үхэршэн И.Содбоев ба Дулдаргын аймагай «Онон» үүлтэртэ ажахын адуушан Б.Нацакдоржиев тухай мүнөөдэрэймнай хөөрөөн.
ЭРХИМ ҮХЭРШЭН
Илья Санданович Содбоев Оловяннын аймагай Долгокыча нютагта 1966 ондо долоон хүүгэдэй зургаадахинь боложо түрэһэн. Сандан абань Халхын голой байлдаанда хабаадаһан, Агууехэ Эсэгын дайнай ветеран, Кёнигсберг хүрэтэр ошоһон юм. Залуугаар, 46 наһатайдаа наһа бараһан. Цырегма эжынь ара талын ажалай ветеран, 90 хүрэтэрөө мэндэ ябаһан шуу. Тэдэ хоюулаа Могойтын аймагай Хара-Шэбэрһээ уг гарбалтай байһан.
Гансаараа үлэһэн хайрата эжыдээ туһалха, шэрээ дээрээ эдеэ хоолтой байхын тула Илья багаһаа ажал хэжэ эхилһэн. Могойтын СПТУ дүүргэжэ, трактористын мэргэжэлтэй боложо гараа бшуу. Тус мэргэжэлээрээ 24 жэлэй туршада хүдэлһэн юм. 1987 ондо Хүһөөшэ нютагта Марина басагантай танилсажа, хуби заяагаа ниилүүлһэн. Тэрэ гэһээр энэ бүлэ сугтаа, бэе бэеэ дэмжээд, бүхы бэрхэшээлнүүдые дабажа, баяр баясхалангаараа хубаалдажа ябана. Табан үхибүүдтэй: гурбан хүбүүд, хоёр басагад. Ехэ хүбүүниинь Степь станциин һургуулида баг-шалдаг, дундахинь – тэндэл электромонтёр, бага хүбүүн Шэтын эмнэлгын колледжын оюутан юм.
2000 ондо Илья Содбоев «Могойтуйский» ажахын үхэршэн болоһон байна. Мүнөө тэдэ 88 үхэр харана, хоёр туһалагшатай. Басагад 9-дэхи ба 3-дахи ангинуудай һурагшад, нагаса аба, эжытэеэ Хүһөөшэ нютагта ажаһуудаг шуу. Амаралтын үедэ бүлөөрөө сугларжа, гэрээр дүүрэн байдаг. Үмсэдөө хони, ямаа, мори үсхэбэрилдэг, гахай олоор баридаг байһан аад, мүнөө нэгэн-хоёрые баридаг болоһон.
«Урдань ажахыдамнай үхэр олон байдаг һэн. Һүүлэй жэлнүүдтэ хүндэ сагууд тохёолдоод байна. Юуб гэхэдэ, үбһэн бага, ажал хэхэ хүнүүд дуталдана. Тиигэбэшье мүнөө хабар 100 үхэрһөө 86 тугал абаабди. Талада байжа һураһан байнабди», - гэжэ Илья Содбоев тэмдэглэнэ.
ЭРХИМ АДУУШАН
1968 оной январиин хүйтэн соогуур Тугшан нютагай Сагаан Хүнды гэһэн газарта Агын тойрогой мүнөөдэрэй эрхим адуушан Баир Нацакдоржиев түрэһэн намтартай.
Тэрэ 1975 ондо Тугшанайнгаа дунда һургуулиин богоһо алхажа, 1985 ондо 10-дахи анги түгэсхөө. 1986 онһоо хоёр жэлэй туршада Приморско хизаараар болон Амарай можоор дайсанай авиацида эсэргүүсэдэг хамгаалалгын сэрэгтэ алба хааһан байна. Нютагаа бусаад, арбаад жэлдэ хониндо ябаа. 1993 ондо Тугшанайнгаа Жигзыма басага һамга абажа, гэр бүлэ болоо бшуу. Тэдэ мүнөө зургаан хүүгэдтэй - хоёр хүбүүд, дүрбэн басагад. Одхон басаганиинь табатай, хүүгэдэй сэсэрлигтэ ябадаг. Үшөө нэгэ басаган - 2-дохи ангиин һурагша. Улаан-Үдэ хотодо хоёр басагад дээдэ һургуулида һурадаг. Хоёр хүбүүд сэрэгэй албанһаа ерээд, аба эжыдээ туһална.
Баир Буиновичай «Онон» үүлтэртэ ажахын адуушан болоһоор, 6-7 жэл боложо байна. Гэр бүлэнь Тугшанһаа зүүн тээшээ 10 гаран модоной зайда оршодог Зүдхэлиин адаг гэһэн газарта ажаһуудаг. «Яагаашье һаа, мориндо дуратайб. Абамни, ахаймни адуушан ябаһан. Мүнөө 284 мори харадагби. Үбэлэй хүйтэн сагта хүндэшэг байдаг. Тиигэбэшье булта суг ажалаа хэжэ, бэрхэшээлнүүдые дабадагбди. Үнгэрэгшэ хабар 100 гүүнһээ 75 унага абааб. Адуушанаар хүдэлхэдэ, сэдьхэлни тэнюун байдаг. Мориндоо мордоод, үргэн уужам талаар ябаха юунтэйшье сасуулхаар бэшэ юм. Үбэлдөө туранхай, муунуудыень барижа, газаагаа үбэлжүүлдэгбди. Моридой хажуугаар үмсынгөө үхэр баринабди. Бүхы хүүгэдээ мориндо мордохуулжа һургааб. Номгон морид олон байха. Тэдэнэй тоодо «Шансон». Тэрээндэ дуу дуулаха абьяастай Баира басагамни нэрэ үгөө һэн. Ехэнхидээ мориднай ород нэрэнүүдтэй», - гэжэ Баир Нацакдоржиев хөөрэбэ.
Дэлгэрэнгыгээр 46-дахи дугаарта.
