Могойтын аймагай «Улаан Одон» ажахын ахалагша хонишон Алдар Цыденов түрэл ажахынгаа баялиг – дун сагаан хонин һүрэг гурбадахи жэлээ хаража байна. Залуу малшан даашадаа харууһалдаг малаа тобир тарган байлгажа, жэл бүри ондо һайн оруулдаг. Хабартаа эхэ хонидоо түрүүлжэ, түл эрхимээр абадаг юм. Мүнөө А.Цыденовтэнэй буусада малай үбэлжэлгэ түлэг дундаа. Малшан үдэр бүри малдаа хоол үгөөд, уһалаад, бэлшээридэ гаргажа адуулдаг юм. Малай үбэлжэлгэдэ хүрэхэ үбһэ тэжээлээр дүүрэн хангаатай. Фураж бии. Онон голой хойто бэеын хагда ногоондо бэлшэхыень малаа үдэр бүри туужа гаргадаг. Малынь тобир тарган зандаа. Цыденовтэн ажахынгаа 250 толгой нютагай нарин нооһото үүлтэрэй эхэ хони арьбажуулдаг. Yбэлжэлгын үедэ малдаа, хонидтоо нэмэри хоол тараажа үгэнэ. Дабhа долёолгоно. Байгша ондо хонишоной бүлэ түл абалгаар Могойтын аймаг, тойрог дотороо эрхимүүдэй тоодо ороһон байна бшуу. Алдар хүдөө буусада мал хаража, ама тоһодожо, урма зоригтойгоор ажалаа ябуулдаг юм.
   Хүдөөдэ малда һая ороһоншье һаа, эрхимээр ажаллажа, ажахын, аймагай зүгһөө магтаалтай хүдэлнэ.
   Тээсгэн Могойтодо үнгэргэгдэһэн тойрогой хүдөө ажахын хүдэлмэрилэгшэдые хүндэлэн ёһололгын һайндэртэ «Улаан Одон» ажахын малшан Алдар Цыденов тойрогой Захиргаанай зүгһөө баярай бэшэгтэ хүртэһэн байна.

You have no rights to post comments