Догой нютагһаа гарбалтай бэлигтэй уран зохёолшо ниитэ олондо зорюулһан зохёолнуудаа бодото байдалһаа һабагшалжа бэшэхэдээ, «табяад гаран жэл соо сэдьхэлэйм оёорто мүндэлһэн бодолнуудаа монсогойлжо, ном болгоод, «нара» харуулбаб» гэжэ бэшэһэн байна.
   «Минии юртэмсэ» ном 6 бүлэгһөө бүридэнэ. «Ажабайдал тухай гүн бодолнууд», «Намтараар һонин шарайнууд», «Үүринэрэймни үлзы заяан» гэжэ бүлэгүүдтэ эрхим дээжэ бүтээлнүүдээ бүридхэжэ, элдэб һалбарида амжалта туйлаһан буряад угсаатанаа ба өөһэдыгөө һайн талаһаа харуулһан үүринэрээ түүрээбэ гээшэ. Тиихэдэ «Үндэр түрэлтэ Далай ламын Ага нютагта айлшалалга», «Нютагайнгаа нэрые нангинаар сахия!» г.м. олон тоото толилолгонуудыень, зохёохы ажалыень шэнжэһэн хүнүүдэй һанамжануудые, «Толон» һониндо хэблэгдэһэн өөр тухайнь интервью гэхэ мэтые уншахаар. Мүн гэр бүлын ба мартагдашагүй үйлэ хэрэгүүдтэ хабаадажа байхадаа, мэдээжэ хүнүүдтэй суг буулгаһан дүрэ зурагуудыень һонирхожо хараа бэлэйб.
   «Уянгын жэгүүр» бүлэг соо «Гэр тухай бодолнууд» поэмэ, үхибүүдтэ зорюулагдаһан үгүүлэлнүүд, «Шүлэгүүд соом...», «Наһанай харгы», «Хүнэй заяан» г.м. шүлэгүүдыень эжэлүүдгүй уяран уншахаар юм. Тэрэнэй хажуугаар «Ага - найдални», «Бодолтойгоол шэлэгшэб», «Нангин мэдэрэл» г.м. һайхан дуунуудынь ноототоёо ном соо оруулагдаба. Тус ном соохи зохёолнуудынь буряад ба ород хэлэнүүд дээрэ хэблэгдэбэ. Зузаахан гадартай ном үнгэтэ фото-зурагуудаар шэмэглэгдэжэ, Эрхүү хотын «Репроцентр+» хэблэлэй газарта 500 хэһэгээр шанартайгаар барлагдаһан байна.
   Жалсан ЛУБСАНДАШИЕВ.

You have no rights to post comments