Могойто тосхоной ажаһуугшадай нобшоо хаядаг газар заха хизааргүй үргэдэжэ, оршон тойронхидо үзэмжэгүй байдал үзүүлнэ.
Оршон тойронхиёо сэбэр байлгаял.
Ажаһуугшадынь нобшын газар руу дүтэлэнгүй, хараһан газарта нобшо ноохойгоо хаяжархина. Тосхоной зүүн бэедэ оршодог нобшын газарһаа саарһан, целлофан пакедүүд, эдеэ хоолой үлэгдэлнүүд тала дайдаар таража, байгаали бузарлана. Хойшоо Зугаалай, Хара - Шэбэр , урагшаа Сагаан-Уула , Харганааша нютагууд руу ошодог харгыгаар таран хиидэнэ. Нобшо ноохой Харганааша һуурин болотор ниидэжэ, тэндэ ажаһуудаг зондо бэлэгүй байдал ушаруулна.
Могойто тосхоной захиргаанай толгойлогшын тушаал һая эзэлһэн Чингис Дугаровай урда тосхонойнгоо нобшын газар гуримшуулха ажал гол зорилгонуудайнь нэгэн болоно. Тиин октябриин 10-һаа эхилжэ, тосхоной нобшо хаядаг газар дээрэ халуун хүдэлмэринүүд эхилээ. Бульдозер, погрузчик унаанууд нобшо түлхижэ обоолно. КамАЗ унаанууд нобшо шэрэжэ, тусхай бэлдэһэн газарта суглуулна. Тосхоной захиргаанай архитектурын таһагай мэргэжэлтэн Зорикто Ленхобоевой хэлэһээр, харгын ДЭУ, Теплосети, Дорсервис, ТУБаир эмхинүүдэй техникэ хэрэглэгдэнэ. Арбан хоног соо 2 мянга гаран тонно нобшо хаягдаа. Ерээдүй сагта хорёологдохоор түсэблэгдэнэ. Аншлагууд шэнээр табигдаха. Пятница бүхэндэ тосхоной ажалша коллективүүд сэбэрлэлгын ажалда гарадаг гуримтай.
Дэлгэрэнгыгээр 42-дэхи дугаарта.
