Агын Буряадай тойрогой байгуулагдаһаар 80 жэлэй ойдо зорюулагдаһан «Агинский Бурятский округ: история, современность и векторы развития» гэһэн эрдэмэй-практическа конференциин «Соёл ба урлал» гэһэн секциие тойрогой Захиргаанай социальна һалбариин хүтэлбэриин соёл ба тамир хүгжѳѳлгын таһагай даргын орлогшо Саяна Аюшиева хүтэлэн ябуулаа.
Д.Сергеев (зүүн гарһаа), Т.Цымпилова, Р.Цыдендоржиев, О.Дарижапова.
Түрүүн Забайкалиин гүрэнэй университедэй соёл урлалай факультедэй декан, гүн ухаанай эрдэмүүдэй доктор Д.Сергеев элидхэл хэхэдээ, тэрээн соогоо «Кризисэй үедэ соёлой һалбари доройтоогүй, улам хүгжэжэ, экономикодо хабаатай, олзо оршо оруулха аргатай байһанаа гэршэлээ. Тиимэһээ мүнѳѳ соёл дээрэ мүнгэ хэхэ гэһэн үзэл бодол дэлгэрээ. Тон түрүүн энээн тухай Великобританида хэлсэжэ эхилээ, тэндэл соёл гээшэ экономико хүгжѳѳхэ гол аргануудай нэгэн болоно гэһэн хараа бодолтой программа байгуулагдаһан» гэжэ тэмдэглээ. Удаань Үбэр Байгалай хизаарай соёлой министрэй орлогшо Т.Цымпилова соёлой һалбариин мүнгѳѳр хангагдаха экономическа арга боломжонууд тухай элидхэхэдээ, федеральна, региональна, нютагай бюджедүүдһээ мүнгэ һомололго, бюджедһээ гадуур - түлбэритэй хангалта (платные услуги), спонсорско туһаламжа, һайн дуранай туһаламжа, грант, олзын хэрэг эрхилэлгэ, байшан, эд хэрэгсэл арендээр үгэлгэ гэхэ мэтэһээ олзолхо мүнгэн тухай хѳѳрѳѳ: «Анхан гүрэнэй гү, али муниципальна эмхинүүд бюджетнэ мүнгэндэ хүртэдэг һаа, мүнѳѳ ниитэ ямаршье эмхинүүд, тэрэ тоодо гүрэнэй гү, али муниципалитедэй талаһаа эмхидхэн байгуулагдаагүй коммерческэ бэшэ эмхинүүд бюджетнэ мүнгэндэ хүртэхэ аргатай. Мүнгэнэй хажуу тээшээ ошохогүйн тула, жэшээнь, библиотекарьнүүдэй, уран зохёолшодой гү, али музейн ажалтадай холбоон гэһэн шэнги ѳѳһэдын социально-ориентированнэ эмхинүүдые байгуулхыетнай дурадханабди. Тиигээ һаа, таанад элдэб грантова конкурснуудта хабаадажа, мүнгэ татаха аргатай болохот».
Үбэр Байгалай хизаарай буряад соёл хүжѳѳлгын түбэй методист Цырендулма Батомункина «Агинский Бурятский округ как территория бренда «Алтан хүреэ» - «Золотое кольцо Забайкалья» гэһэн элидхэл дурадхаа. Тэрээн соогоо тойрогой дэбисхэр дээрэ бренд болохоор жэшээнүүдые дурадхахадаа, тойрогһоо урган гараһан эрдэмтэдые, ниитэ ажаябуулагшадые, нютаг оронойнгоо хүгжэлтэдэ бүхы хүсэ шадалаа үгэжэ хүдэлһэн зоноо, тойрогой социально-экономическа хүгжэлтэ, тойрогой дурасхаалта газарнууд, ажаһуугшадай ёһо заншал, эндэ ажаһуудаг элдэб үндэһэтэд г.м. нэрлээ. Элидхэгшэ хизаарай хэдэн нютагуудай хабаадалгатайгаар «Алтан хүреэ» - «Золотое кольцо» гэһэн аяншалгын зам байгуулха дурадхал оруулаа. Энэ аяншалгын зам нютагыемнай холо ойгуур мэдээжэ болгохо гэһэн һанамжаяа мэдүүлээ бшуу.
Секци хүтэлэн ябуулагша С.Аюшиева бренд тухай сэдэб үргэлжэлүүлхэдээ, иигэжэ тэмдэглээ: «Мета брендгүйгѳѳр инвестиционно, аяншалгыншье бренд байгуулхын аргагүй. Тиимэһээ буряад хэлэеэ мета бренд болгоод, энээнһээ тойрогой соёлой эмхи бүхэнэй, нютаг бүхэнэй ѳѳр ѳѳрын бренд зохёогоо һаань болохо байгаа».
Дэлгэрэнгыгээр 48-дахи дугаарта
