Буряадай предприятинуудай ашагладаг зайн галай үндэр сэн хамаг ажахы үйлэдбэриин хүгжэлтэдэ нилээн һаад хэдэг, тиимэһээ экономикын талаар хүршэ можодо яаха аргагүй булигдадаг.
Жэшээнь, хоол хүнэһэнэй сэнгээр бодоходо, Ангарск, Шелехов хотонуудай ойлгохоор бэшэ (хими холиһон гү, али хайшааб гэхээр шанартай) зүйлнүүд Улаан-Үдын наймаагай дэлгүүрые сүм эзэлэнхэй байдаг. Эрхүүгэй можодо зоной ажаһуудалай хэрэглэлэй киловатт-часай сэн 1 түхэригтэ хүрэдэггүй байхадань, Буряадта 3 түхэригһөө үлүү байгаа. Зайн галай үндэр сэнгэй нэгэ шалтагынь хадаа Буряад Улас анхан сагһаа Россиин Нэгэдхэмэл элшэ хүсэнэй холбоо һужаагай амяараа бэһэлүүртэ оруулагдаһан байгаа юм.
Хэдэн жэлэй туршада Буряад Уласай Толгойлогшо федеральна засаг зургаануудта элшэ хүсэнэй сэн доошолуулха тухай асуудал табидаг болонхой. Энэ жэлэй эхинһээ хойшо федеральна зургаанууд сэн доошонь болгохо арга бэдэржэ захалаа хэбэртэй. «Читаэнергосбыт» болон «Иркутскэнерго» хоёр эмхинүүдэй хоорондо сүлөөтэ хэлсээ баталһанай ашаар бөөнөөр худалдалгын абалгын дэлгүүртэ «бусад» гэжэ нэрлэгдэдэг ашаглагшадта (промышленность, бага ба дунда хэмжээнэй бизнес) зайн галай сэн 24,2 хубяар доошолоо. Буряад Уласта ажаһуугша зон урдань киловаттай түлөө 3,24 түхэриг түлэдэг байһан һаа, 2016 оной июлиин 1-һээ эхилжэ, 2,87 түхэриг түлэдэг болоо. Россиин элшэ хүсэнэй яаман Буряадые зайн галай сүлөөтэ шэлжэлгын FZSBOE01 «Сибирь» бэһэлүүртэ оруулба. Энэ бэһэлүүртэ Эрхүүгэй, Красноярскын, Алтайн, Кемеровын, Новосибирскын, Томскын можонууд, Хакасси ба Тыва ородог юм.
Дэлгэрэнгыгээр 44-дэхи дугаарта.
