Энэ хэмжээ ябуулга соёлой габьяата хүдэлмэрилэгшэ Б.Дархановай мүнхэ дурасхаалда зорюулжа, Агын буряад соёл хүгжөөлгын түб ба Агын тойрогой ахиргаан эмхидхэбэ. Мүрысөөндэ Агын, Могойтын, Дулдаргын, Согто-Хангилай, Ага-Хангилай, Шэтын, Бооржын, Хёлгын аймагай Бадын, Буряад ороной Яруунын аймагай Нарһатын, Монголой Дорнод аймагай 33 бүлгэм (766 хүүгэд) хабаадаба. Мүрысөөнэй жюриин гэшүүд «Олоной хабаадаһан бүжэг» ба «Олоной хабаадаһан буряад бүжэг» гэһэн янзануудаар багашуулай, дунда ба ахалагша ангиин һурагшадай бүлгэмүүдые тус тустань сэгнээ юм. Ага тосхоной К.И.Базарсадаевай нэрэмжэтэ уран һайханай һургуулиин «Баяр» ансамблиин бүжэгшэд шадамар бэрхээр хатаржа, дээрэ нэрлэгдэһэн хоёр янзын гран-при шанда хүртэжэ, 20000 түхэригэй сертификадаар шагнагдаа. Б.М.Дархановай, В.Д.Жамсарановай, И.П.Гергеновэй гэр бүлынхид, тиихэдэ Агын буряад соёл хүгжөөлгын түбэй эрхилэгшэ С.Ж.Норполова гэгшэд эдэбхитэйгээр мүрысэһэн бүжэг-шэдтэ тусхай шангуудые барюулаа юм. Энэ баярта үдэр Забайкалиин хизаарай соёлой габьяата хүдэлмэрилэгшэ Б.Б.Базаргуруева Забайкалиин хизаарай засаг даргын баярай бэшэгтэ хүртэбэ.
Эрдэм НИМАЕВ.
