Бальжин Жамсарановна 1976 ондо багшын ажалай түрүүшын алхамуудые Шандалиин дунда һургуулида эхилһэн байна. Ород хэлэ бэшэг ба литература заагаа, һуралсалай болон хүмүүжүүлгын ажалаар директорэй орлогшоор хүдэлөө.
Дулдаргын дунда һургуулида 1988 онһоо багшалжа эхилһэн юм. Тэрэ гэһээр олон лэ эдир дулдаргынхидые ород хэлэнэй дүримүүдтэй, ород уран зохёолшод болон бүтээлнүүдтэйнь танилсуулаа. Бальжин Насакова 2002 онһоо эрдэмэй-методическа ажалаар директорэй орлогшоор ажаллана. Тэрэ 2013 ондо «Развитие творческого потенциала старшеклассников в профильном обучении» гэһэн сэдэбээр диссертаци бэшэжэ, педагогикын эрдэмүүдэй кандидадай зэргэ хамгаалһан юм. Тэрэнэй һурагшад муниципальна, региональна, бүхэроссиин хэмжээнэй олимпиада, зохёохы конкурс болон эрдэмэй-дүршэл абалгын конференцинүүдтэ хабаадажа, һайн дүн харуулдаг.
