РСФСР-эй арадай гэгээрэлэй эрхим, II шатын «За заслуги перед Отечеством» орденой медаляар, «100 лет профсоюзам России» медаляар шагнагдаһан, 51 жэлэй туршада хүүгэдэй саадта хүмүүжүүлэгшээр, даагшаар ажаллаһан Серафима Намсараева мартын 13-да 75-тай болобо. Түрэһэн үдэрѳѳрнь, тойрогой 80 жэлэй ойн баяраар дашарамдуулан уулзажа, Ага тосхоной хүүгэдэй саадуудай хүгжэлтэ тухай хѳѳрэлдэбэбди.
- Серафима Баясхалановна, Ага тосхон дээрэ түрүүшын хүүгэдэй саадууд хэзээ хүдэлжэ эхилһэн хаб?
- Октябриин хубисхалай һүүлээр багахан хүүгэдые харадаг гэрнүүд бии болоо. Анна Татаурова болон үшѳѳшье һамгад, нянечка ба хүмүүжүүлэгшэд гэжэ тиихэдэ илгардаггүй байгаа, үхи хүүгэдые суглуулаад лэ харадаг байгаал даа. Дайнай урда тээ хүүгэдые иигэжэ суглуулхаяа болишоо. Дайнай һүүлээрхи жэлнүүдтэ, 1950 гаран онуудта хүүгэдэй саадууд байгуулагдажа эхилээ. Эгээл түрүүшын детсад, минии һанахада, Юбилейный переулогай баруун углууда (мүнѳѳ хүнэй байдаг гэр) ясли байгуулагдаа бэлэй. Хуушан модон гэр һэн. 1965 ондо Мэдэгма басаганайнгаа 2 һаратай байхада, тэрэ яслида ябуулааб. Нялха нарай, хүхѳѳр байгаа. Үдэртѳѳ хоёр дахин эдеэлүүлхэ аргатай һэм. “Багульнигта” хүдэлжэ байхадаа, гүйжэ ошоод, басагаяа эдеэлүүлээд, һуурииень һэлгүүлээд ерэдэг байгааб.
- “Багульник” түрүүшын саадуудай нэгэн болоно гү?
- Би 1962 онһоо “Багульник” саадта хүдэлѳѳб, энэ саад, багсаахада, 1956-1957 онуудаар нээгдэһэн ха. Тэрэмнай хүүгэдэй хоёр бүлэгтэй детсад һэн. Үшѳѳ Дом пионеров болоод байһан гэртэ хоёр бүлэгтэй саад байгаа. Тиихэдэ радио-дамжуулгын хуушан байшанда (мүнѳѳ байра) хоёр бүлэг байгаа. Мүн мүнѳѳнэй тойрогой Захиргаанай байшанай һуурида хуушан модон гэр байгша һэн – тэндэ хоёр бүлэг байгаа. Иигэжэ найман бүлэгтэ сэлеэнэй хүүгэд ябадаг һэн. 1960-аад онуудта саадта ябаха хүүгэд үсѳѳн, 20- 30 хүүгэд ябадаг байгаа. Хожомынь тэрэ ясли мүнѳѳ “Радуга” гэһэн дэлгүүрэй байшан соо түбхинѳѳ бэлэй. Яслиһаа маанадта - “Багульник” саадта 3 наһа хүрэһэн хүүгэдые үгэдэг һэн. 1970 гаран онууд болотор тиигэжэ хүдэлѳѳбди.
- Удангүй Та саадые даагша болоо бэзэт?
- Би 1962 онһоо 1971 он болотор хүмүүжүүлэгшээр хүдэлѳѳб. Тэрэ сагта амар байгаа, түлбэригүйгѳѳр курорт ошогты гэжэ хүсѳѳрѳѳ гэхээр эльгээдэг һэн. “Заабол ошо”, - гэжэ профсоюзаймнай түрүүлэгшэ Светлана Шойдоржиевна Ванданова байха. Курортһоо ерэхэдэм, зүблэл түрүүлэгшэ Семён Дмитриевич Еланов дуудаад, “Намсараева, саадые даагша боло”, - гээ. “Багульнигта” Раиса Алексеевна Смирнова, Раиса Степановна Топоркова мүнѳѳ мэндэ байна, Валентина Александровна Сорокина г.м. һамгадтай 1983 он болотор һайн лэ хүдэлѳѳбди. Тиигэжэл хэдэн хуушан гэрнүүд соо детсадууд байгаал даа. Бүхы саадууд нэгэл кухнитай байха, шулуун гэр соо, “Багульнигта”. Тэндэһээ эдеэ хээд, нянинууд саадуудаар тараадаг бэлэй.
- “Туяа” хэдыдэхи саад боложо нээгдээб?
- 1983 ондо “шэнэ саад нээ” гэһэн даабари намда үгтѳѳ. Маанадта дамжуулагдаһан хуушан райисполкомой байшан соо хоёр жэлэй туршада заһабарилга хээд, 4 бүлэгтэй «Туяа» саад нээгээ агша һэмди. Эгээл түрүүшын ясли-саад “Малыш” гэжэ нэрэтэй һэн. Тиигээд “Багульник” байгаа. 1967 оной апрель һарада “Солнышко” нээгдээ бэлэй. Мүнѳѳ апрель соо 50 жэлэйнгээ ойн баяр хэхэеэ байна. Удаань - “Аленький цветочек”, ДСУ-да - “Ручеёк”, тиигэһээр олон болоо даа. Тойрогтомнай хүүгэдэй саадуудта анхарал ехээр хандуулагдана, мүнѳѳ Ага тосхон дээрэ аяар 11 саад хүдэлжэ байна ха юм. Эдэ саадууд соо хүүгэдые хүмүүжүүлхэ талаар бүхы эрхэ нүхэсэл түхеэрэгдэнхэй: һаруул группанууд, хүгжэмэй-тамирай залнууд, тааруу эд бараан, тренажёрнууд, компьютернууд бии.
Дэлгэрэнгыгээр 11-дэхи дугаарта.
