- Оксана Николаевна, өөр тухайгаа хөөрэжэ үгыт даа.
- Би Волго мүрэнэй эрьедэ оршодог Кострома хотодо 1980 ондо түрөөб. Энэ хото Москвагай ойрохоно оршодог, харин уг гарбалаараа эндэхиб, эжымни Шэтэ хотодо түрэhэн, абамни Шэтын аймагай Үлэнгэ нютагай юм. Шэтэдэ дунда hургуули түгэсхөөб. Тиигээд Владивосток хотодо оршодог Алас Дурнын федеральна университедэй Түүхын ба философиин дээдэ hургуулиин философиин, шажан hургаалай (теология) ба шажан шэнжэлэлгын факультет түгэсхэжэ, культурологой мэргэжэлтэй болооб. 2006 онhоо Алханада экскурсоводоор хүдэлжэ эхилээб. Харин тэрэ сагта би Екатеринбург хотодо аяншалгын шэглэлээр ажалтай байгааб. Аяншалгын хаhын эхилхэдэ, Алхана ерэдэг һэнби. 2015 ондо Екатеринбург хотоhоо Алхана зөөжэ ерээб.
- Алханатай яагаад танилсаабта?
- 1990-ээд онуудай эсэсhээ жэл бүри Алханаар аяншалдаг hэмди. Шэтэhээ Элеэ hууринда буугаад, тэндэhээ үндэhэтэнэй парк ябагаар ерэжэ, майхануудые татажа байрладаг һэмди. Алхана - минии «түрүүшын дуран», гайхамшагта байгаалидань, нангин шүтөөнэй, бурхантай газартань дары түргөөр дурлаhан байнаб. Буддын шажанда шүтэдэг болооб, тиигэжэ Энэдхэг, Балба, Хитад, Монгол оронуудаар ябааб. Yндэр түрэлтэ 14-дэхи Далай ламын уншалгануудта 5-6 жэлэй туршада ходо ошодог hэм, 2007-2008 онуудта Буряад ороной, Yбэр Байгалай буддын шажанай шүтөөнтэй газарнуудай мүрэй хүтэлбэри (путеводитель) зохёохо түлэблэлөөр олон газараар мэдээсэл суглуулжа аяншалhан байнабди.
- Экскурсоводой ажал хэсүү гү?
- Гид гээшэ эрдэмтэй, аян замаа hайн мэдэхэ, хүн зонтой харилсаха, юумэ хөөрэхэ, мэдээсэхэ шадабаритай байха ёhотой. Элдэб hонирхолтой хүнүүд ерэдэг, олон ухаан бодолой орёо асуудалнуудтань зүб харюунуудые үгэхэ хэрэгтэй. Тиихэдэ экскурсовод заабол бэе hайтай байха, аяншалагшадые ходо анхаржа ябаха ёhотой, аюулгүйе сахиха гээшэ ехэ шухала. Гидүүд мэргэжэл дээшэлүүлгын курснуудые ходо гаража, хүгжэжэ байха ёhотой.
- Эдэ олон жэл соо hонин ушарнууд болоhон лэ байха…
- Тиимэ, тоолошогүй олон. Холо ойроhоо, хари гүрэнүүдhээ зобоhон, тулиhан, үбшэн зон манай Алхана зорижо, бэеэ аргалхаяа, сэдьхэлээ амаруулхаяа, хүүгэдые гуйхаяа ерэдэг. Тэдэ зон Алханын «юрөөлдэ» хүртэжэ, hайн болодог, hанаhан хэрэгынь бүтэдэг, хүсэлнүүдынь бэелүүлэгдэдэг юм. Баймга, жэл-хоёр жэл болоод, дахин Алхана ерэхэдээ, баяр баясхалан хүргэдэг шуу. Энээндэнь би ехэ баярладагби, даган баясадагби.
- Һайнта даа.
Цымжидма ДОЛГОРОВА.
