Буряад республикын Залуушуулай нэгэдэлнүүдэй хамтарал (АМО – Ассоциация молодёжных объединений) нёдондо жэл арбан жэлэйнгээ ойн баяр тэмдэглэһэн байна. Тиимэ ушараар түүхэ, эмхидхэһэн хэмжээ ябуулганууд, амжалтанууд тухайнь энэ дугаартаа бэшэбэбди.
ТҮҮХЭ
Хамтаралай түүхэ 2000 онһоо эхитэй. Тэрэ үедэ Яруунын аймагай эдэбхитэй залуушуул ниигэмэй хүдэлөө байгуулжа, аймаг дотороо элдэб янзын соёлой-тамирай хэмжээ ябуулгануудые эмхидхээ. Һүүлээрнь тэдэ Буряад оронойнгоо бусад аймагуудай хүбүүд басагадые урижа, олон болоһон байна.
2003-2005 онуудта тамирай мүрысөөнүүд эмхидхэгдэжэ эхилээ. Баргажанай, Түнхэнэй, Захааминай залуу үетэн эдэбхитэйгээр хабаададаг болоо юм. Эдэ булта саашадаа хамта олон хэмжээ ябуулгануудые хэжэ, дүй дүршэлтэй боложо, ажалаа бүри һайнаар, журамтайгаар ябуулжа эхилээ. Тиигээд залуушуулай бүхы эмхинүүдые нэгэдүүлһэн хамтарал байгуулха сагай ерэхэдэ, 2006 оной ноябриин 12-то Улаан-Үдэ хотын И.К.Калашниковай нэрэмжэтэ номой санда АМО байгуулагдаба. Президентээрнь Яруунын аймагай Эрдэни Дымчиков һунгагдаһан байна.
АМО-гой гэшууд.
Хамтаралда ажал «бурьялжа» эхилээ. Эмхиин урда Буряад ороной залуушуулые, ондоо регионуудай землячествануудые нэгэдүүлгын ехэ зорилгонууд табигдаа. Эрдэни Чимитович иигэжэ хөөрэбэ: «2007 ондо Москва хотодо энэ хамтаралайнгаа филиал нээгээбди. Тэрэл сагта Томск, Красноярск, Новосибирск, Эрхүү хотонуудай, Агын тойрогой землячествануудтай ажал ябуулагдажа эхилээ. Улаан-Баатар хотодо манай эмхиин түлөөлэгшэ бии болоо. Бидэ - хүбүүд, басагад үдэртөө, һүниндөөшье хүдэлдэг һэмди. Манай эмхидхэһэн хэмжээ ябуулганууд олонойл хүсэ шадалаар хэгдэһэн, эмхидэмнай бюджет гэжэ байгаагүй ха юм».
Дэлгэрэнгыгээр 13-дахи дугаарта.
