Тойрогоймнай ажаһуугшад нютагаа өөдэнь татажа, сэбэр байлгаха гэжэ оролдодог юм. Мүнөөнэй мүнгэн хашарһанай хомор сагта нютагтаа ажаһууһан зон өөһэдөө эдэбхи гаргажа, һууринаа бүришье һэргээхэ гэжэ эрмэлэзэдэг болонхой. Нютаг бүхэндэ ТОС-ууд байгуулагдажа, ажаһуугшадай ашаар хамтын хэрэгээ бүтээнэ бшуу.
Һүүлшын хоёр-гурбан жэл соо ТОС-уудай хоорондо конкурс эмхидхэгдэжэ, зоной ажал урмашуулагдана. Тойрогой комиссиин гэшүүд саһанай ехээр ороодүй байха үеэр нютагуудай ТОС-уудые, ариг сэбэрые сахилгаар хүдэлмэринүүдые ябажа хараа, сэгнэлтэ үгөө. Конкурсын эрилтын ёһоор, нютаг бүхэндэ модод таригдаhан, нобшо хаядаг газар түлхигдэжэ обоолоотой, малай адуулга эмхидхэгдээтэй байхань шухала. Аймагуудай захиргаанууд эрхим нютагуудаа тойрогой конкурсдо хабаадуулна. Дулдаргын аймаг Табтаанай, Тугшан, Дулдарга hуурингуудые энэ жэлэй конкурсдо дурадхаhан байна.
ДУЛДАРГЫН АЙМАГАЙ НЮТАГУУД
Табтаанай нютаг Дулдарга ба Ага тосхоной хоорондын харгы дээрэ оршодог гээшэ. Харгыгаар урагша хойшоо ябаhан зоной харахада, сэбэр, шэнэ байшангууд баригдаатай, харгы зубшаад модод таригдаатай байдаг. Олон баннернууд үлгөөтэй. Нютагай захиргаанай толгойлогшо Туяна Лубсанова Дулдаргын МП-тэй хэлсэжэ, бульдозерыень ашаглажа, нобшо түлхюулээ. Һургуулиин, саадай ажалтадые хабаадуулжа, нобшо дээгүүрхи саарhа, пакет суглуулжа шатааhан байгаа. Үхэhэн мал хаядаг газар шэнээр хорёолоо. Худагуудаа ариг сэбэр байлгадаг юм. Жамсо Тумуновай нэрэмжэтэ гудамжаар оршодог худаг hэльбэн шэнэлээ. Зорикто Цыденов худаг ажаллажа, нарин харууhан дороо байлгадаг. Хойто хотондоо үшөө нэгэ худагтай. Табтаанайн олохон ажаһуугшад газаагаа худаг малтуулжа, өөһэдын уhатай болонхой. Гүрэнэй программаар шэнэ гэр байранууд баригдадаг. Эгээл һүүлшын гэхэдэ, олон хүүгэдэй эжы Ирина Самбуевада гэр баригдажа үгтөө hэн. Табтаанайда “Берёзка”, “Галхан” ТОС-ууд бии. Ударидагшадынь Д.Шагаева, Б.Дармаев гэгшэд болоно. Хоёр ТОС-ой гэшүүд уран зохёолшо Жамсо Тумуновай түрэhөөр 100 жэлэй ойдо зорюулжа, нютагтаа угаа ехэ ажал хээ. Музейн байшаниие hэльбэн шэнэлээ, мододые hуулгаа, хоккейнэ талмай барижа эхилээ.
Дулдаргын түбэй ТОС-ой талмай.
Дулдаргын аймагта эгээл холо оршодог Тугшан нютагта сэбэрлэлгын ажал гүйсэд ябуулагдадаг. Нютагай зон хорёо хотынгоо газаагуур, гудамжануудаа бог шоройhоо, шабааhа шэбхэhээ хуу арилганхай, сагаадаhан байба. Онон голой эрье шадар, Лусад тахидаг нангин шүтөөнэй газарнуудаар ябажа, нобшо суглуулhан байха юм. Нобшо хаядаг газарта бага бэшэ ажал хээтэй. Тугшан нютагайхид үмсэдөө мал олоор баридаг. Захиргаанай данса соо харахада, тугшанайхид 2800 толгой эбэртэ бодо мал үсхэбэрилнэ. Тэдээнэй оройдоол мянга гараниинь хүдөө буусануудаар, харин бэшэниинь нютагай түб дээрэ тэжээгдэнэ гэжэ хэлэгдээ. Тиимэһээ нютаг соо ганса шабааhаниинь ямар ехэ байлтайб гэжэ һанахаар. Зүгөөр Тугшанаар ябахада, нобшодо дарагдаhан байдал үзэгдөөгүй. Эндэ мал адуулга һайнаар эмхидхэгдэжэ, хабарһаа эхилжэ, гурбан хотон болоод, гурба-гурбан айл ээлжэлэн адуулдаг юм. Нютагhаа зон гаража ошодоггүй. Үнгэржэ байhан жэлдэ 30 үхибүүд мүндэлөө. Сентябриин эхиндэ hургуулида 174 hурагшад байhанаа, мүнөө 182 болоо. Гудамжануудаар 30 светодиодно гэрэл үлгэгдэжэ, үдэшэ үглөөндөө hаруул болоо бшуу. Худагаа заhабарилаа. Нютагайнгаа парк соо нарhан, уляаhан мододые hуулгаhан байна. Тугшанда “Хэшэг”, “Заря”, «Хүсэн» ТОС-ууд байгуулагданхай. Багашуулай наадаха талмай бэлдээ, паркын хорёо шэнэлээ.
Дэлгэрэнгыгээр 46-дахи дугаарта.
