Тойрогой дэбисхэр дээрэ соёлой, тамирай, энхэ элүүр хамгаалгын үүргэ дүүргэдэг байшангууд һэльбэн шэнэлэгдэнэ, шэнээр баригдана. Могойтын аймагай Сагаан-Шулуутай нютагай соёлой байшан шэнээр баригдана. Тус байшанай барилга байгша оной июнь һарада эхилһэн юм. Шэтэ хотын үмсын хэрэг эрхилэгшэ Спартак Мкоян аукцион шүүжэ, байшанай барилга эрхилхэ эрхэтэй болоо һэн. Мэргэжэлтэдэй тэмдэглэһээр, барилга бэе дээрээ даажа абаһан эмхи хизаар дотор, тэрээнһээ гадуур олон байшангуудые бариһан байха ёһотой. Тиин С.Мкоянай хүтэлбэриин барилгашад түрүүшын үдэрһөө эхилжэ, байшанай һуури бэлдэжэ, томо нүхэ малтаа. Цемент шудхажа, бүхэ һуури табихаяа бэлдэнэ. Барилгын объект хүреэлэгдэжэ, хорёогоор хаагдаа. Мүнөө үедэ бетонно блогууд, хирпиисэ буугаад байна. Хизаарай «Служба единого заказчика» гэһэн гүрэнэй эмхи барилгын ябаса шалгажа байха, һүүлдэ бэлэн болоходонь тушаажа абаха юм. Сагаан-Шулуутай нютагай ажаһуугшад ерэхэ жэлэй ноябрь һарада соёлой шэнэ ордонтой болохоор түсэб табина. Могойтын аймаг дотор Хара-Шэбэрэй, Могойто тосхоной соёлой байшангуудта капитальна заһабарилганууд хэгдэнэ.
   Тойрог дотор «Демография», «Спорт – норма жизни», «Развитие образования» гэһэн гурбан үндэһэн программын хэмжээндэ һургуулинуудта, тамирай байшангуудта заһабарилганууд хэгдэжэ байна. Россиин юрэнхылэгшын дэмжэһэн хэмжээ ябуулганууд манай тойрогто үндэр хэмжээндэ гүйсэдхэгдэнэ. Тодорхойлходо, Хойто-Агын дунда һургуулида, Дулдаргын «Светлячок» хүүгэдэй сэсэрлигтэ капитальна заһабарилганууд хэгдэнэ. Хойто-Агын һургуулида пластикова сонхонууд табигдана. Тиихэдэ Зугаалайн, Балжанын, Согто-Хангилай дунда һургуулинуудай тамирай танхимууд соо ажал ябуулагдана. Гол түлэб Согто-Хангилай тамирай танхим соо ханануудынь жэгдэлэгдэнэ.
   Байгша ондо болон ерэхэ жэлдэ Ага тосхоной «Үльгэр», «Ромашка», «Ручеёк», Дулдаргын «Теремок», «Ромашка» сэсэрлигүүдтэ залгалаа байшангууд баригдахаар хараалагданхай. Ага тосхоной 4-дэхи һургуулиин газаа, Шэнэ Орловскын хүүгэдэй сүлөө сагаа үнгэргэдэг буланда, Могойтын 2-дохи һургуулиин стадион дээрэ һурагшадай наадаха, бэеэ элүүржүүлхэ тамирай талмайнууд түхеэрэгдэнэ. Ага ба Могойто тосхонгуудай гудамжануудаар бэеэ һоридог тамирай түхеэрэлтэнүүд зо-хёогдохо бшуу. Мүнөө сагай эрилтээр, дунда һургуулинууд дулаан туаледүүдээр хангаатай байха ёһотой. Агын аймагта - Согто-Хангилай, Үбэр Аргалиин, Хойто-Агын, Хүнхэрэй, Дулдаргын аймагта – Зүдхэлиин, Могойтын аймагта – Хара-Шэбэрэй, Хилын, Зугаалайн, Наринай Адагай, Хүһөөшын, Бооржогонтойн, Догойн, Ушарбайн, Сүүгэлэй, Ага тосхоной 4 һургуулинуудта дулаан туаледүүд баригдана.
   Хабартаа һүжэрһэн талын түймэрһөө олон хүдөө һуурингууд, малшадай буусанууд, мал, зоной унаа, техникэ хохидолдо ороо, шатаа бэлэй.
   Мүнөө малшадай буусануудые һэргээжэ, шэнээр бариха хүдэлмэринүүд хэгдэнэ. Могойтын аймагта малшадай 4 бууса дээрэ гэр, 2 дал, 3 хашаар баригдана. Барилгын материалнуудаар хангаатай. «Дружба» ажахыда малшадай гэр хушалта доро орожо, сонхо, үүдэн һуулгагдана, зайн галай утаһанууд татагдана, пеэшэн, дал, гурбан хашаар баригдана. «Тепловые энергетические сети» (Сагаан-Шулуутай) ба «Капитель» (Шэтэ) гэһэн подрядна эмхинүүд малшадай буусануудые бодхооно.

You have no rights to post comments