Буряад ороной үндэһэтэнэй номой сангай библиографиин болон нютаг ороноо шэнжэлэлгын таһагые даагша Дарима Базароватай уулзажа, ажаябуулганууд тухайнь хөөрэлдэһэн байнабди.
- Дарима Васильевна, Танай хүтэлдэг таһаг хэзээ байгуулагдаһан бэ?
- Таһагаймнай ажаябуулга 1965 онһоо эхитэй. Тиихэдэ хоёр ондоо шэглэлэй таһагууд байһан: мэдээсэлэй-библиографиин ба нютаг ороноо шэнжэлэлгын. Элдэб янзын хубилалтанууд боложо, мүнөө эдэ таһагууд нэгэдүүлэгдэһэн. Таһагтамнай үшѳѳ эрхэ хуулиин мэдээсэлэй түб ородог.
- Ямар гол зорилгонуудые табинабта?
- Бидэ номой сангай бүридхэлтэй хүдэлдэгбди: газетэнүүдэй, сэтгүүлнүүдэй, конференцинүүдэй элидхэлнүүдэй суглуулбариин ерэхэдэ, Irbis системэ соо оруулдагбди. Эдэ номуудай удхыень уншагшадта богонихоор бэшэдэгбди.
- Ямар хэмжээ ябуулганууд эмхидхэгдэдэг бэ?
- Номой сангай ниитын харилсаа холбооной таһагтай хамта олон хэмжээ ябуулгануудые үнгэргэдэгбди. Жэшээнь, Библионочь, номой салон, буряад хэлэнэй долоон хоног г.м.
- Номой санда буряад хэлэнэй курснууд үнгэргэгдэдэг. Тэрээн тухай хөөрэжэ үгыт.
- Тиимэ, 2014 онһоо буряад хэлэнэй курснуудые эмхидхэжэ эхилээбди. Манай номой сангай ажалтан Н.Г.Лубсанова хоёрдохи мэргэжэлээрээ буряад хэлэнэй багша юм. Жэлэй хоёр дахин - намар ба хабар курснууд эмхидхэгдэдэг. Заримдаа «Аза хүсэл» гэһэн буряад арадай аман зохёолой бүлгэм урижа, һурагшадтаа дуу, хатар наада заадагбди, таабари, жороо үгэнүүдтэй танилсуулдагбди.
- Таһагтатнай олон хүн хүдэлнэ гү?
- Мүнөө арбан хоёр хүн ажаллана. Мэргэжэлээрээ булта библиографууд бэшэ. Филологууд олон болонхой. Юуб гэхэдэ, Зүүн Сибириин гүрэнэй соёлой ба уран урлалай академидэ библиограф мэргэжэлтэдые бэлдэхэеэ болиһон. Ехэнхидээ тэндэ референт-аналитигууд һурана. Энэ хадаа нэгэ бага ондоо мэргэжэлтэд, баримта бэшэгүүдтэй хүдэлхэ ёһотой зон.
Дэлгэрэнгыгээр 50-дахи дугаарта.
