Россиин Уран зураашадай холбооной гэшүүн, Могойтын аймагай соёлой байшанай дэргэдэхи «Энгэр хээ» гэhэн моодын театрай хүтэлбэрилэгшэ Намжилма Эрдынеевагай ажал Номгон далай шадарай гүрэнүүдэй онлайн-үзэсхэлэндэ хабаадаа.
Хари гүрэнүүдтэй эб найрамдалай хитадай арадай бүлгэмэй өөрынгөө сайт дээрэ онлайн гуримаар эмхидхэhэн «Искусство стран Тихоокеанского региона» гэhэн 20-дохи үзэсхэлэндэ Намжилма Эрдынеевагай «Поэзия шаманки» зураг хабаадана. Энэ зурагынь Үбэр Байгалай хизаарhаа дурадхагдаhан 4 ажал сооhоо шэлэгдээ. Үзэсхэлэндэ дэлхэйн олон гүрэнүүдэй уран зураашадай ажалнууд хабаадана. Эмхидхэгшэдынь галерейн виртуальна хэлбэри (модель) хэжэ, экспозицида табигдаhан зурагуудые элдэб тээhээнь харахаар болгоо. Тус хэмжээ ябуулгада элдэб шэглэлнүүдээр ажалнууд – живопись, акварель, инсталляци г.м. табигдаhан байха юм.
Намжилма Эрдынеевагай «Буряад зураг» гэhэн үндэhэн буряад маягаар зураhан зураг соо элдэб үнгэнүүдэй наадан харуулагдаа, хубсаhанай ба нюурай жэжэ хубинууд нарин нягтаар, тодоор дамжуулагданхай.
