Агын аймагай Шэнэ Орловск тосхондо гартаа дүйтэй, уран бэлигтэй хүнүүд олон юм. Тэдэнэй нэгэн үндэр наһатай уран зурааша, ажалай ветеран Анатолий Юдин болоно.
А.Юдин.
Анатолий Алексеевич наhанай амаралтада гарахадаа, тоhон шэрэ, биирэ гартаа барижа, зураг зуража эхилээ. Тэрэ сагhаа оршон тойронхи байдал, байгаали, хүн зониие анхаралтайгаар адаглажа, олон натюрморт, хүнэй дүрэ, байгаали харуулһан гоё һайхан зурагуудые бүтээгээ. Бидэ нёдондо жэл Забайкалиин хизаарай «Играй, гармонь! Звени, частушка!» фестивальда Шэнэ Орловск тосхон ошоходоо, уран гартадай ба зураашадай үзэсхэлэн дээрэ «Онон гол», «Агын тала», «Набшаһанай уналга», «Yдэшын элшэ туяа», «Жэлэй дүрбэн саг» гэхэ мэтэ зурагуудыень хужарлан хараа һэмди. Мүн нютагай уран зураашын бүтээлнүүд - агууехэ ород хүгжэм зохёогшод П.Чайковскиин ба А.Даргомыжскиин дүрэ зурагууд Шэнэ Орловскын үхибүүдэй хүгжэмэй hургуулиин танхим соо үлгөөтэй байдаг. «Зураг зурахадаа, хитад шэрэ хэрэглэдэггүйб. Намда гансал совет үедэ хэгдэhэн шэрэнүүд байха. 1990-ээд онуудта Шэтын Уран зураашадай холбооной дэргэдэхи наймааhаа хэдэн үнгын шэрэ олоор худалдажа абаа һэнби, тэрэмни ехэ туһа болоо», - гэжэ Анатолий Юдин хэлээ hэн.
Түрэл тосхонойнгоо олониитын хэрэгтэ эдэбхитэйгээр хабаададаг Анатолий Алексеевич хизаарай, тойрогой, аймагай hайн дуранай уран зураашадай, урашуулай конкурснуудта, мүрысөөнүүдтэ хабаадажа, лауреадай, дипломантын үндэр нэрэ зэргэнүүдтэ хүртэhэн. Yзэсхэлэндэ табигдаhан уран бүтээлнүүдынь харагшадта эжэлүүдгүй һайшаагдадаг. 1990 ондо Шэтын можын уран зураашадай ба уран гартанай үзэсхэлэндэ түрүү hуури эзэлээ. 1992 ондо Шэтэ хотодо үнгэргэгдэhэн Сибириин ба Алас Дурна зүгэй уран зураашадай региональна үзэсхэлэндэ хабаадажа, Магаданhаа эхилээд, Красноярск хото хүрэтэр элдэб нютагуудhаа ерэhэн уран зураашадтай, бүтээлнүүдтэйнь танилсаhандаа урма баяртай ябадаг. 2000 ондо Агуу Илалтын 55 жэлдэ зорюулагдаһан Шэтын можын арадай урлалай фестивальда «Салют Победы» гэhэн зурагаа дэлгэжэ, 1-дэхи шатын дипломоор шагнагдаа hэн. Юрэдөө, бүхы баярай бэшэг, шагналнуудыень тоолохо болоо hаа, нилээд олон даа.
Дэлгэрэнгыгээр 14-дэхи дугаарта.
