Дулдаргын аймагай «Эрхим Баатар-2019» гэһэн мүрысөөнэй илагшад: хурьган хуасай угай Д.Дондоков, һойһод омогой А.Арбалжинов, бодонгууд угай Ц.Бороев ба баруун хуасай омогой Владимир Дашиев гэгшэд жэнхэни һайхан буряад хубсаһатай хабаадагшадые тайзан дээрэ урижа, хатад «Нютагаа магталга» гэһэн түрүүшын янзада уг гарбалаа, нютаг нугаяа түүрээжэ, аялга дуугаа бэлэглэһэн байна. Найдамтай ханинар, хүндэтэй эжынэр арадай хатар уян нугархайгаар гүйсэдхөө, «Сэдьхэлэйм аялга» янзада оршон үеын дуу дуулаа, «Угайм алтан абдарһаа» гэһэн мүрысөөндэ арадайнгаа ёһо заншал, домог түүхэ мэдэхэ байһанаа гэршэлээ. Һүүлшын «Элинсэгэйм баялиг» гэһэн янзада буряад хубсаһа, зүүдхэл шэмэглэл харуулжа, сугларагшадые бахархуулаа. Эсэстэнь жюриин гэшүүд дүнгүүдые татажа, 35-һаа 44 наһан хүрэтэр хатадай дунда Догойн Билигма Гончикжапова ба Шулуутайн Эльвира Цыбенова гэгшэдтэ 3-дахи шатын диплом ба 4000 түхэригэй сертификат барюулагдаа. Амидхааша нютагай Эржена Цыдыпова түрүүшын һуури эзэлжэ, диплом ба 6000 түхэригэй сертификадаар, Зүдхэлиин Аягма Анчикдоржиева ба Сагаан-Шулуутайн Һама Батоева хоёр 2-дохи һуури эзэлжэ, тус тустаа баһал диплом ба 5000 түхэригтэ хүртэбэ. Ага тосхоной эмшэн, 3 хүүгэдэй эжы Цындыма Батомункуева энэ бүлэгтэ гран-при шан абажа, жюриин гэшүүн, Россиин Федерациин соёлой габьяата хүдэлмэрилэгшэ Бальжима Базаргуруева илагшын диплом болон 12000 түхэригэй сертификат барюулаад, «Сагаан һарын хатан-2019» гэһэн лентэ зүүлгэһэн байна.
Хоёрдохи бүлэгэй мүрысөөндэ 45-һаа 55 хүрэтэр наһатай эхэнэрнүүд хабаадажа, Могойтын аймагай Хила нютагай Ажима Батомункуева 2-дохи шатын дипломоор ба 5000 түхэригөөр шагнагдаа һэн. Нэгэдэхи шатын диплом болон 6000 түхэригэй сертификадта Ага тосхоной абьяас бэлигтэй хатан Энхэма Цыбжитова хүртэхэ хубитай байба. Илангаяа тэрэнэй танилсуулга, дуулаһан дууниинь аргагүй гоё байгаа. Зүгтөө Будалан нютагай, олзын хэрэг эрхилэгшэ, абхан харгана угай, 4 хүбүүдэй эжы, 49 наһатай Баира Жаргаловада гран-при шан (12000 түхэриг) ба илагшын диплом үгтэжэ, нютагайхидынь маша ехээр баярлаһан байна. Тайзан дээрэ наһанайнь нүхэр, үри хүүгэд, 2 бэреэд, 3 ашанарынь гаралсажа амаршалаа бшуу.
