Урданай түүхэ уудалха, ухашалха дуратай хадаа Агын тойрогой 80 жэлдэ зорюулан, тэрэ холын сагта хүдэлhэн, ехэ ажал бүтээжэ, нютагайнгаа хүн зониие ударидаhан аха захатанаа дурсаха дуран хүрэнэ. Бидэ, наhатайшуул, үри хүүгэдтээ, аша, гуша, дүшэнэртөө тэдэнэй наhанай ажал хэрэг, эрмэлзэл, намтарыень дамжуулха, хөөрэжэ үгэхэ ёhотойбди гэжэ һананаб даа. Иимэ ушарhаа Агын аймагай Дунда-Ага (Сахюурта) нютагай урдалхуу хүнүүдэй нэгэн ябаhан, хамтын ажахын түрүү ударидагша Жамсаранжаб Намсараев тухай дурсалга дурадхагдана.
Ж.Намсараев (зүүн гарһаа) ба Ринчин дүү хүбүүниинь гэр бүлэнэртэеэ.
Нютаг нугадаа хүндэтэй болоһон Жамсаранжаб аха тухай тобшо тэдыгээр хэлэхэдэ, Дунда-Ага нютагай хүбшэ тайгаар, ан гүрөөлөөр, алим жэмэсээр баян, үзэсхэлэн гоё байгаалитай «Хэрэг» гэжэ газарта хурса хутагата худанса шарайд омогой Согтын Намсарайн үнэр баян бүлэдэ дүрбэн басагадай удаа хүбүүн үри 1908 ондо түрэhэн намтартай. Тиигэжэ аргагүй ехэ баяр болоо hэн ха. Нэрээ нэрлүүлхэ хүбүүтэй болоhон Намсарай түрэhэн абань ардагай hайниие унажа, мориной хурдаар Агын дасан ерэжэ, зурхайшанда гуйлта барижа, угаа үргэлжэлүүлхэ үридөө Жамсаранжаб гэжэ hайхан нэрэтэй болгоод, нютагаа бусаhан түүхэтэй. Намсарайтанай бууса шадар үргэл мүргэлтэй Даша Балбар обоо, үльгэр домогто ороһон Балжан хатанай амарhан түүхэтэ газар оршодог.
Жамсаранжаб хүбүүн балшар наhанhаа гэртэхинэйнгээ хажууда үхэр мала харалсан, аха зоной үгэ дуулаха, дүүнэрээ дүмэхэ зан заршам сахижа, хүдөөгэй бэлэгүй байдал бэе дээрээ үдэр бүри үзэжэ, ажал хүдэлмэридэ бэрхэхэнээр үндыhэн...
Дэлгэрэнгыгээр 20-дохи дугаарта.
