УРДА НАһАНДАА...
Дэлхэйн булангуудаар хаа-хаанагүй багахан үхибүүдэй урда түрэлэйнгөө наhанай дурсалгануудые хөөрэжэ гайхуулдаг ушарнууд олон. Тиимэ дурсалганууд, онсодоо, үхибүүнэй 2-4 наhатайда бии болоод, 6-7 наhандань мартагдадаг гэжэ ажаглагдаhан.
Олонхи ушарнуудта үхибүүд урда наhандаа гэнтын аюулда орожо, наhанhаа хахасаhан тушаагаа хөөрэдэг ха. Тиихэдээ тон эртэ урдын сагта ба хари гүрэндэ ажаhууhан тушаа хэлэгдэдэггүй, үнгэрhэн hаяын зуун жэлнүүд нэрлэгдэдэг.
Энэ талаар элдэб гүрэнэй эрдэмтэд шэнжэлэлгэнүүдые ябуулhан байна. Шри-Ланкын Харалдсон ба Стивенсон гэhэн эрдэмтэд тиимэ 60 ушар шэнжэлhэн. Тэдээн соо буддын шажанай ламанар байhан тушаагаа хэлэдэг 3 хүбүүд ехэ анхарал татаа гэжэ тэмдэглэгдэнэ. Нялха наhанhаа тэдэ хүбүүд буддын шажанай хэрэгсэлнүүдээр онсо hонирходог, хэлэндэ орохоhоо: «Лама болохоб», - гэжэ үргэлжэ дабтадаг байгаа ха. Саашадаа абари зангаараа, хэрэг ябадалаараа буддын санаартанай эрхим ламанарай түхэл шэнжэтэйгээр хүгжэн ургаhан ха.
Тэдэ гурбан хүбүүдэй хоёрынь буддын шажанда мүргэлтэй, харин нэгэниинь католическа сүмэдэ hүгэдэдэг бүлэдэ түрэhэн намтартай. Бусад үхибүүдтэй ехэ наададаггүй, элhээр, шабараар, пластилинээр дасан дугангуудые барижа наададаг, хорхой шумуул аладаггүй, гэртэхинээ ламын хубсаhа оёжо үмдэхүүлхыень гуйдаг, ехэ нарин шэн абаритай хүбүүд байгаа. Тэдэнэй нэгэниинь Асгирия гэhэн дасанай шэрээтэ байhанби гэдэг hэн ха. Тэрэ дасан асархадань, шэрээ сагаан бүдөөр хушаагүйдэнь яашье hуужа үгөөгүй hэн гэдэг. Асгирия дасанай урдын заншал тиимэ байгаа. Нялха наhанhаа амарлингы тэнюун, ямар нэгэн нааданхайда, амтатай эдеэндэ мээхэйрдэггүй абари зангаараа илгардаг гэжэ онсо тэмдэглэгдэнэ.
ХѲѲГѲѲР ТАМГАЛДАГ ЗАНШАЛ
Эртэ урдын сагhаа зүүн зүгэй арадууд нүгшэhэн хүнэй бэе хара хөөгөөр тамгалдаг заншалтай. Хүнэй удаадахи наhандань тэрэ тэмдэгынь заабол гарадаг гэдэг.
Америкын Вирджини хотын университедэй профессор Джим Такер гэгшэ энэ талаар ехэ нээлтэнүүдые хэhэн. Тэрэ «Агууехэ үе саг» гэhэн хүдэлмэри соогоо бусад эрдэмтэдтэй хамта шэнжэлhэн 2000 реинкарнациин – нүгшэhэн хүнэй түрэлөө урилхын ушарнууд тухай бэшэhэн байна.
- Нүгшэhэн хүнэй түрэлөө урилжа, шэнэ бэе бэелхын ушар - хүнүүдэй миин таамаг, хуурмаг хөөрөөнүүд бэшэ, харин шэнжэлэгдээдүй олон нюуса таабаринуудтай, ехэ үргэн гүнзэгы шанартай үзэгдэл, - гэжэ Джим Такер онсо тэмдэглэнэ. Ямаршье нютаг оронhоо, үндэhэтэнһѳѳ, шажан мүргэлhөө, эрдэм болбосоролhоо г.м. дулдыдадаггүй, үнэн дээрээ хаа-хаанагүй ажаглагдадаг. Гансал буддын шажан хэдэн мянгаад жэлэй саада тээ гүн удхыень ойлгожо нээhэн.
Джим Такерай ном соо хэлэгдэhэн шэнжэлэлгэнүүдтэй танилсуулая.
Нэгэ үбгэнэй наhа барахада, түрэлхидынь гартань хара хөөгөөр тэмдэг табиhан байгаа. Жэл үнгэрhэн хойно тэрэ бүлэдэ тэрэл газартаа мэнгэтэй хүбүүн түрэбэ. Гэнтэ хоёртойдоо хүгшэн эжыгээ нүгшэhэн үбгэнэйнь мээхэйрэн эрхэлүүлжэ нэрлэдэг ара нэрээрнь дуудаhан байгаа. Yбгэнэй гээгдэhэнэй hүүлээр бэшэ хэншье тэрэ нэрээр хүгшэниие нэрлээгүй. Һүүлдэнь хүбүүхэнэй эхэ зүүдэндээ абатаяа уулзахадань, тэрэнь гэр бүлэдөө бусахаб гэжэ мэдүүлhэн тушаа хөөрэhэн ушартай.
Америкын Майами хотын социальна эмнэлгын газарта Дайан гэдэг ахамад медсестрагай тушаалда хүдэлдэг. Нэгэтэ тэндэнь ехэ ханяадатай ба амяа бүтэжэ зободог уушханай үбшэнтэй бүhэтэй хүн аргалуулhан байгаа. Дайан ехээр оролдон, тэрэниие ажаллаhан ха. Залуу хүн мүрэ дээрээ хахад hарын түхэлтэй томохон мэнгэтэй байгаа. Залуушуул бэе бэедээ дурлажа, хүбүүнэй эдэгэхэдэ, гэрлэhэн гэдэг. Олон жэлэй туршада золтой жаргалтай ажаhууhан ха.
Энэ бүлын түүхэ ехэ hонин эхи захатай. Хэдэн жэлэй саада тээ Дайан психотерапевтдэ гипнозоор аргалуулhан ушартай. Нэгэтэ ээлжээтэ сеансын үедэ тэрээндэ нэгэ hонин үзэгдэл үзэгдэhэн гэдэг. Хойто Америкэдэ дайнай үе. Дайан, тэндэхи үндэhэн арадай эхэнэрэй бэетэй, нарай үхибүүгээ гартаа тэбэреэд, дайсадhаа хоргодоно. Yхибүүнэйнь духада хахад hарын дүрсэтэй мэнгэ элеэр харагдаа hэн. Дайсадай дүтэлхэ үедэ үхибүүниинь шашхахаа hанаба. Мэгдэжэ hүрдэhэн залуу эхэ үхибүүнэйнгээ ама альгаараа шангаар бүглэжэ, үхэтэрынь амииень хаажархиhан байгаа.
Тэрэ үхибүүнэй духынь мэнгэ наhанайнь инаг нүхэрэй мүрэ талын мэнгэтэй тон адли дүрсэ түхэлтэй байжа гайхуулаа.
Джим Такерай «Агууехэ үе саг» гэhэн бүлгэмэй эрдэмтэдэй шэнжэлэлгээр, амияа бүтэдэг астма үбшэнтэй зон урдахи наhандаа амяа хаагдажа, бахалуурдуулжа, боолгожо гээгдэhэн гэхэ.
ГЭНТЭ ХАРИ ХЭЛЭН ДЭЭРЭ ДУУГАРХА
Турци гүрэндэ эрдэмтэд нэгэ хүбүүе адаглан шэнжэлhэн байна. Тэрэ хэлэндэ орохоhоо эхилжэ: «Би - нюураа буудуулжа алуулhан сэрэгшэб», - гэжэ хөөрэдэг байгаа. Тэрэ хүбүүн нюурайнгаа баруун талада элдэб олон hорьбонуудтай түрэhэн. Эгээл һонирхолтойнь гэхэдэ, тэрэ хотын эмнэлгын газарай архив соо дайнай үедэ нюурайнгаа баруун тала ехээр шархатаhан сэрэгшын аргалуулаад, наhа бараhан тушаа тэмдэглэлнүүдтэй эмнэлгын карта олдоhон.
Уураг тархяа ехээр гэмтээд, саг зуурын туршада аминиинь ба зүрхэнэйнь сохидол тогтожо, клиническэ үхэлэй удаа амидырhан зоной зариман түрэл хэлэнhээнь тад ондоо хари хэлэн дээрэ дуугаржа эхилдэг. Тиимэ ушарнууд дэлхэй дээрэ олон.
- Гэнтэ хари хэлэн дээрэ дуугаржа эхилhэн ябадал түрэлөө урилhанай гансал шалтагаантай, - гэжэ Джим Такер хэлэнэ. Хүн урда түрэлдөө дуугардаг байhан хэлэеэ hанана. Тэрэ ксеноглоссия гээд нэрлэгдэдэг байдалда бэшэ ондоо тайлбари байхагүй.
Америкын нэгэ ажаhуугша эхэнэр багаhаа поляк, ород, чех ба англи хэлэнүүд дээрэ дуугардаг иммигрантнуудай бүлэдэ урган хүмүүжэhэн. Өөрөө тэрэ үшөө француз хэлэ шудалжа эхилhэн байгаа ха. Нэгэтэ тэрэ психоаналитигта хандажа, гипнозоор аргалуулха үедөө швед хэлэн дээрэ дуугаржа эхилээд, «Би - Швециин таряашанби», - гээд өөрыгөө нэрлэжэ гайхуулаа. Урдань швед хэлэ хаанашье шудалаагүй эхэнэр швециин таряашадай хэрэглэдэг тусхай үгэнүүдые хэлэдэг байгаа. Тэрэ эхэнэрые эрдэмтэд элдэб янзын аппарадуудаар шалгаад, ямаршье мэхэгүй, эрдэм hуралсал багатай таряашанай хэлэн дээрэ ярина гэжэ тодорхойлhон байна.
