Энэ жэл Эрдэм мэдэсын һайндэр онсо ондоохон маягаар эмхидхэгдэбэ. Коронавирус үбшэнэй дэлгэрээд байха үедэ тэрэниие һэргылэмжын хэмжээнүүдые абахань, бэеэ абажа ябаха санитарна дүримүүдые сахихань шухала. Роспотребнадзорой эрилтын ёһоор, 1-дэхи болон 11-дэхи ангиин һурагшадта Сентябриин 1-эй баяр ёһололто линейкэнүүд үнгэргэгдөө.
Ага тосхоной 3-дахи һургуулида һуралсалай шэнэ жэлдэ 670 һурагшад оробо, 93-иинь - нэгэдэхи ангиин һурагшад. Тэдэнэр 4 класста хубаагдаа. Харин арба нэгэдэхиин 40 һурагшадта һүүлшынхеэ түрүүшын хонхо жэнгирээ.
Класс бүхэндэ өөрын кабинет баталаатай. Хэшээлнүүдэй хоорондо хүүгэдэй олоор суглархагүйнь тула забһарлалнуудынь тусхай гуримаар зохёогдоо, тиимэһээ һурагшадай һүүлшын хэшээлнүүд ондо ондоо сагта дүүрэхэ юм. Иигэжэ үхибүүдэй олонтой харилсаа һэргылхэ хэмжээнүүд абтана.
