Буусаа эрьеыш
Түби дэлхэйдэ мүндэлэн түрөөд,
Тоонто нютагтаа хүлөө шоройдоод,
Эхынгээ гараар эльбүүлэн үндыгөөд,
Эсэгынгээ hургаалаар эрхим ябааш.
Эрдэм бэлигэй hудал баряад,
Эрид урагшаа дабшан зорёош.
Нэрээ нэрлүүлхэ үритэй болоод,
Намтараа залгуулха ашые харааш.
Холын хотоhоо эрьен ерээд,
Харьялаа булагhаа амсан хүртыш.
Эжы абаяа золгон тэбэреэд,
Энгэртээ няажа мэндээ мэдүүлыш.
Үетэн нүхэдшни шамайгаа угтаад,
Үрдилдэн хөөрэхэ hониноо хубаалдан.
Сагаан эдеэгээ шэрээдээ табяад,
Сэржэмэй дээжээр хүндэлэн байхал.
Бууса газаршни баясан hэргээд,
Буян хэшэг үршөөн үгэхэл.
Хүсэ шадал абан хүльбэрөөд,
Ханаажа сэдьхэлээ бусахаш гэртээ.
Ноябриин 13, 2020 он.
Хашартай хамшаг
(Шог шүлэг)
Хамагшатай буруундал жэшээлмээр,
Хамар, амамнай халхалаатай.
Хэзээ хобхорхо хамшаг юм,
Хэн энээниие мэдэхэ юм?
Аргамжаатай мориндо
адлишаамаар,
Аладые дабахань хорюултай.
Аюулта муухай үбшэн юм,
Аргашад яажа сараха юм?
Хүн бүхэн сээртэйнүүд,
Ходол бэедээ хананхатайнууд.
Хаанаhаа гараhан осол юм,
Хашартай болоод байгаа юм?
Гуримаа сахяад бүгэдөөрэн
Гэртээ байял тэсэмгэйнүүд.
Гасалантай хэсүү байдал
Гаталжа гарахамнай дамжаггүй.
Декабриин 3, 2020 он.
Эжыгээ үгылнэб
Уули шубуунай абяанhаа
Оршон тойрон жэхынэ.
Ошоhон эжыгээ дурсахадаа,
Ойндомни түхэлынь харагдана.
Шонын уйтай уляанhаа
Сошоод дайда зэнхынэ.
Шарайень эжынгээ hанахадаа,
Сээжэмни уйтаран шанална.
Наранай буртагта ороходо,
Намжаа тэнгэри бүрхэнэ.
Наhанhаа халиhан эжымни
Нойртомни ходол үзэгдэнэ.
Декабриин 22, 2020 он.
Ономнай
Yерлэн урдаа Ономнай
Yлир мойhон шэмэгтэй юм.
Урданhаа үмдэhэн дэгэлнай
Угалза торгон хээтэй юм.
Харьялан урдаа Ономнай
Хайлааhан, бургааhан элбэгтэй юм.
Халюун, булган малгаймнай
Хилэн, хоргой хүбөөтэй юм.
Бурьялан урдаа Ономнай
Баатар, Гэдэргэ түүхэтэй юм.
Буряад-Монгол энгэрнай
Буян хэшэгэй hүлдэтэй юм.
Июлиин 25, 2020 он.
Щуя-Ханда ЦЫРЕНОВА.
